galdakaoko berbalagun

Generoaren inguruko mahai-ingurua

2012-01-24T12:16:00.008Z

Antolatzaileak: Galdakaoko gazte asanblada eta
Pantxike Galdakaoko emakumeak taldea

Eguna eta ordua: Urtarrilaren 26an, 19:00etan.

Lekua: Torrezabal kultur etxea

Sarrera dohainik

Berbalagunok ere emakumeenganako indarkeriaren aurka gaudenez, urtarrilaren 26an Torrezabalen egingo den mahai-inguruan parte hartzeko deia egiten dugu. Oso interesgarria eta baliagarria izango da hitzaldia, gainera solasaldia bukatu ostean tailerrak ere egingo dituzte.

BERBALAGUNOK ERE BERDINTASUNAREN ALDE!

Urtarrilaren 28an Orixol mendira.

2012-01-23T11:56:00.011Z

ORIXOL MENDIA

- Zonaldea: Urkiola
- Altuera: 1131 m
- Ibilbidea: 3:30 ordu gutxi gora behera
- Irteera ordua: 8:30ean
- Ez ahaztu aldatzeko botak

Urtarrilaren 28an, larunbata, Hego-Uribeko berbalagunok Urkiolako Orixol mendira egingo dugu lehen mendi irteera.
Irteera ordu eta eta lekua: 8:30ean Galdakaoko udaletxeko plazatik.

Izena emateko galdakao_berba@aek.org edo hegouribe@aek.org helbidera bidali mezua, zenbat kotxe eraman behar ditugun jakiteko.

Mendi taldea

2012-01-23T11:23:00.013Z

Euskaldunok eta mendia beti lotuta egon gara.

Hego-Uribeko berbalagunok mendi taldea sortu dugu. Hilabetean behin-edo mendi irteera bat egingo dugu mendiaz eta euskaraz elkarrekin gozatzeko.
Aldez aurretik, blog honen bidez, zein facebook-en bidez emango zaizue irteeren berri. Eskatzen zaizuen gauza bakarra da izena emateko mezua bidaltzea, zenbat kotxe eraman behar izango ditugun kalkulatzeko.

BOTAK JANTZI ETA ETORRI GUREKIN!!!

Asteazkeneko berbalagunak museoan

2012-01-23T11:18:00.004Z

Urtarrilaren 4an asteazkeneko berbalagunak museora joan ziren.

Talde bereko bi berbalagunen margolan erakusketa ikustera joan eta
bide batez, Bilbotik osteratxoa egin zuten. Eguraldi kaskarra izan arren ederto batean pasatu zutela esan digute.

Goiz pasa ederra artistaz beteriko talde honena!

Abenduko kantugintza saioa

2012-01-23T11:10:00.002Z

Abenduaren 22an loteria ez zitzaigun tokatu, baina Jonuren eskutik antolatu genuen kantugintza saioa et ahorren osteko luntx-a mundiala izan zen.

Euskaraz egin diren maitasun abestirik ezagun eta politenetakoak abestu genituen elkarrekin Jonuren gidaritzapean. Saioan adin guztietako jendea egon zen. Nagusienek Benito edo Urkoren abestiekin gozatu zuten gehien; Gazteek, Su ta gar eta Sorotan Beleren baladekin eta umeek Pirritx eta Porrotxen bertsionatutako “Maite zaitut” kantarekin.
50 liburuxka prestatu genituen abestien letra irakurtzeko eta baten batek ondoan zuenarekin elkarbanatu behar izan zuen, denentzako ez zen egon eta.

Jonu ere oso pozik agertu zen jendearen erantzunarekin, egindako lan txukunak horren erantzun ona izateak edonor pozten du eta. Gainera, abesti baten azalpena ematen ere publiko artean laguntza izan zuen. Eta hori da zuek egitea nahi duguna: Etortzea, parte hartzea eta gozatzea.

Hurrengo saioa aste santuko oporrak baino lehen egingo dugu eta horren berri izango duzue bai blog honen bidez, bai facebook-en bidez.

Harria eta herria hitzaldia

2012-01-20T09:31:00.007Z

Basauriko Euskarabila elkarteak antolatutako Harria eta herria hitzaldian ateratako argazkiak dituzue ikusgai.

Ordubeteko hitzaldi interesgarria eman zuen Iñaki Perurenak. Bertan harriaren eta euskararen jatorriaz hitz egin zuen.

Saioa bukatu eta argazki polit-polita atera ziguten Hego Uribeko berbalagunoi harrijatzolaile leitzarrarekin.

Osteguneko berbalagunon afaria

2012-01-19T19:03:00.006Z

Batzuk lanean, eta bitartean beste batzuk...

Azaroaren 4an osteguneko berbalagunok urteko lehen afaria egin genuen.

Urrian ezagutu genituen aurtengo fitxaje berriak eta astebetera erabaki genuen afaria egitea denok hobeto ezagutzeko elkar. Iaz zazpi lagun, aurten hamalau; kontuak atera…Afaria beste sukaldari batek eta bere bi laguntzaileek egin ziguten eta egia esan, lehia handia egongo da zein baino zein hobea delako. Afalostean guztientzako opariak egon ziren eta horrek giroa gehiago alaitu zuen.

Txokotik irteterakoan betikoa: batzuk goiz etxera eta beste batzuk tabernak ixten.

Hurrengoan ez gara txokoan sartuko!!!

Txalaparta ikastaroa.

2012-01-16T11:37:00.004Z

Urtarrilaren 30ean Txalaparta ikastaro interesgarria egingo dugu.
Saio bakarra izango da, hau da, ez da astero astero egingo dugun kontua.
Jende asko etorriko balitz urtean zehar saio gehiago egingo genituzke.

Txalaparta zer den eta zelan jotzen den ikasiko dugu eta bide batez zarata (musika handirik ez dugu guk egingo) apur bat aterako dugu.

20:00etan Galdakaoko AEK euskaltegian
SARRERA DOHAINIK

Anima zaitezte!!!

Lagun asko elkartu gara, baina gehiago nahi ditugu.

2011-11-22T12:16:00.002Z

Aspaldiko berbalagun!

Taldeak urriaren hasieran geratzen hasi arren, hau da aspaldian idatzitako lehen kronika.

Iraila eta urria oso hilabete neketsuak izan dira, ahalik eta lagun gehien biltzen saiatu garelako. Egindako lanaren emaitza oso positiboa da. Izan ere, iaz baino 35 berbalagun gehiago animatu dira aurten gurekin batera euskararen aldeko bide hau egitera. Talde kopuruak ere, normala denez, gora egin du: iaz baino hiru talde gehiago ditugu.

Ikastaroei dagokienez jakin beharrekoak:

- Dantza taldea
Iazko dantza taldeko irakasleak oraingoz ezin du klaserik eman, baina beste irakasle bat topatzen saiatuko dela esan digu. Espero dugu berak besteko pazientzia izatea… Jakinaren gainean izango zaituztet.

- Jostunen tailerra
Aurten ere asteazkenetan AEK-n izango da. Ordutegia 19:00etan.

- Mendi taldea
Mendizale asko dugunez inguruan mendi taldea ere sortu dugu.
Hilabetean behin-edo txango bat egingo dugu mendituan aditua den berbalagun jator batek gidatuta. Ibilbide atseginak izango dira, ez pentsa Himalaiara igoko garenik.
Hilabetero egingo ditugun ibilbide guztien berri emango dizuet, bai blog-ean, bai facebook-eko web orrian.

- Kantugintza ikastaroa
Iazko kantugintza saioak izan zuen arrakasta ikusita, aurten urtean zehar hiru saio egitea pentsatu dugu. Gabonetako, aste santuko eta udako oporren aurretik geratuko gara AEK euskaltegiko terraza erraldoian. Beraz, nahi beste lagun sartuko garenez, anima zaitezte eta anima itzazue zuen lagunak, ederto batean pasatuko dugu eta.

- Bertsolaritza ezagutu:
Iazko arrakasta eskasa ikusita (lagun bat baino ez zen animatu), aurten izena aldatzea pentsatu dugu. Ez da bertso estoka bat izango, bertsoaren mundura hurbiltzeko tailerra baizik.
Animatzen direnek erabaki dezatela zenbatero geratu:Astero, hilabetean behin, urtean hirutan edo nahi dutena.

Berbataldeetan zein ikastaroetan, astero-astero zein ahal duzuen guztietan, baina…
ANIMA ZAITEZTE GUREKIN ETORTZERA!!!

Euskara atsegin dut!

2011-09-26T08:44:00.002Z

"Atsegin dut!" esamoldea interneteko sare sozialekin lotzen dugu nahitaez. Baina sare sozial birtual hauetaz gain, euskara praktikatzea aurrez aurreko harreman sareak sortzeko era egoki bat izan daiteke. Benetako sare sozialak, alegia.

Urritik aurrera hasiko gara martxan. Hauek dira,oraingoz,Galdakaon dauden taldeak:

Asteartean 19:00etan

Asteazkenean 11:30ean
Asteazkenean 17:30ean (Jostunen tailerra)
Asteazkenean 20:00etan

Ostegunean 19:30ean
Ostegunean 20:30ean

Mendi taldea. Hilabeterik behin asteburuan.

ATSEGIN DUZU? ANIMA ZAITEZ

Barnetegi ibiltariak

2011-06-09T10:04:00.002Z

Urtero bezala, AEK-k bere udako eskaintzaren barruan Barnetegi ibiltariak ditu, oinez eta bizikletaz. Ez dago eskola ordurik mintzapraktikara bideratuta daudelako barnetegiok.

Barnetegi ibiltaria oinez uztailaren 2tik uztailaren 17ra izango da.
ADI! Izena emateko azken eguna ekainaren 23a baita.

Informazio gehiago nahi izanez gero http://www.ibiltaria.aek.org/ bloggean aurkituko duzue.

Udan ere euskaraz gozatzeko aukera polita duzue.

Anima zaitezte.

Ekainaren 23an euskal kantugintza.

2011-06-08T12:12:00.014Z

Ekainaren 23an arratsaldeko seiak aldera, euskal kantugintza saioa AEK-n Jonu gure herriko kantautorearen eskutik. Garai bateko eta gaur egungo euskal abestien jatorria eta zergatia azalduko dizkigu Barandiaran euskaltegiko terraza handian.

Ez duzue EZER ORDAINDU BEHAR, baina izena ematea eskertuko genizueke zenbat liburuxka egin behar ditugun aurrez jakiteko.

Beraz, izena emateko galdakao_berba@aek.org helbidera mezu bat bidali
edo 675 717530 telefonora deitu.

Anima zaitezte hitz gurutzatuen txapelketara!

2011-06-02T16:27:00.002Z

Ekainaren 11n Hitz Gurutzatuen Basauriko II. Txapelketa ospatuko da.

Aurkezpena

Hitz Gurutzatuen Basauriko II. Txapelketa egingo dugu Basaurin datorren ekainaren 11n, larunbatez.

Txapelketa bada ere, eta halakoa da, topaketa baten aurrean gaudela esan genezake, elkarrekin topo egiteko eta elkar ezagutzeko aukera izango baitute egun horretan, giro alaian eta patxadan, euskarazko hitz jokozaleek. Hain zuzen ere, zale horiei guztiei begira antolatu nahi izan dugu txapelketa hau;

Lehiaketa

Hiru aldi izango ditu lehiaketak: sailkapena, finalerdia eta finala, eta honela banatuko dira ordutegian:

09.30 – 10.30 Sailkapena
10.45 – 11.45 Finalerdia

12.00 – 13.00 Finala

Sailkapena

Proba honetan aurreneko hogei postuetan gertaturiko lehiakideak sailkatuko dira finalerdirako. Finalerdira igaro ahal izateko, ezinbestez bukatu beharra dago proba ordubetean.

Finalerdia

Proba honetan aurreneko lau postuetan gertaturiko lehiakideak sailkatuko dira finalerako.

Finala

Agerian eta jendaurrean jokatuko dute finala hartara iritsi diren lau lehiakideek.

Jokoen prestakuntza

Luma taldeko kideak, LUMA hilabetekariaren egileak, arduratuko dira jokoen prestakuntzaz eta haien egokieraz eta zuzentasunaz

Sariak

Finalera iritsi diren lehiakideak

1. postua. Txapela, Luma aldizkariaren urte baterako harpidetza, Dostaizu! , Euskarbel eta Euskal Herriko Txapelketarako dietatxue.

2. postua. Luma aldizkariaren urte baterako harpidetza, Dostaizu! , Euskarbel.

3. postua. Luma aldizkariaren urte baterako harpidetza, Dostaizu! , Euskarbel.

4. postua. Luma aldizkariaren urte baterako harpidetza, Dostaizu! , Euskarbel.

Mokadua

Herri eta elkarte giroko mokadu batez emango diogu amaiera txapelketak lehiakideen artean sortuko dituen “estualdiei”.

Izena-ematea

5 € ordaindu beharko ditu txapelketan parte hartuko duen lehiakide bakoitzak. BOLINTXU AEK EUSKALTEGIAn eman beharko da izena, EKAINAren 9ra arte.

Ekainaren 4an Euskal Jaia Galdakaon

2011-06-01T13:47:00.002Z

Urtero legez, ekaineko lehen zapatuan Euskal Jaia ospatuko dugu Galdakaon.
Aurtengo egitaraua inoiz baino erakargarriagoa da:

Egun osoan trikitilariak, fanfarriak eta txistulariak herriko kaleetan zehar.

11.00 Banda Munizipala. Herriko kaleetan zehar.
12.00 Pintxo dastaketa. Santi Brouard enparantzan.
Sardinada sagardoakin. Muguruko parkean.
12.30 Umeentzako gunea: tailerrak, puzgarriak, jolasak... Lehendakari Agirre plazan.
13.00 Antzar-Txakur erakusketa. Udaletxeko plazan.
15.00 Bazkari Herrikoia. Muguruko parkean.
17.00 Kuadrilen arteko Herri Kirolak eta erakusketa mundiala. Muguruko parkean.
18.00 Talo Dastaketa. Santi Brouard enparantzan.
22.30 Berbena Arizgoiti. Santi Brouard enparantza

Anima zaitez, ea denon artean Euskal Jaia "Euskararen jaia" bihurtzen dugun.

Asteazkeneko taldearen bazkaria

2011-05-26T10:45:00.003Z

Ikasturtea amaitzear dago eta baita Berbalagunen ikasturte honetako hitzorduak ere. Horregatik atzo, asteazkeneko lagunok elkarrekin bazkaltzeko geratu ginen. Astearteko taldekoa den Miren gurekin etortzera animatu genuen, konpainia onean bazkaltzeko eta bide batez beste taldekoak ezagutzeko.

Astero-astero kafetxua hartzen dugun taberna bisitatu barik ezin izan genuen utzi, eta horregatik bazkaldu baino ordubete lehenago geratu ginen ohitura onak ez galtzeko. Bazkari ederra prestatu ziguten astero elkartzen garen tabernatik metro eskasera dagoen jatetxean. Eta bazkalostean, kantuari ekin zioten berbalagun batzuk, gonbidatua besteen artean, beraz hori ondo pasatu zuen seinale izango da.

Aurreko urtearen aldean gizonezkoon presentziak apur bat gora egin arren, oraindik ere, emakumeak nagusi gure taldean ere. Ez gara kexatuko bada...

Ea orain arte bezain ondo jarraitzen dugun, bai aurten bai datozen urteei begira. Taldeak hazten jarraituz gero ez gara tabernan sartuko datorren urtean. Ea egia den, hori oso seinale ona izango litzatekeelako.

Maiatzaren 29an, BOGA Ondarrura!

2011-05-19T08:42:00.004Z

Maiatzaren 29an Bizkaiko ikastolen festarekin dugu hitzordua.

Aurten Ondarrun ospatuko da Ibilaldia eta urtero bezala, euskaltzalez lepo egongo dira berez euskaldunak diren kostadeko herri honetako kaleak.
Lortutako dirua, hezkuntza eredua herriratzeko, eskualde osoan euskara lau haizeetara zabaltzeko eta beharrezkoak dituzten baliabideak lortzen laguntzeko bideratuko da.

Egitaraua kultura euskaintza zabal batek osatzen du. Adin guztietako jendeak du Ibilaldian gozatzeko eta bide batez, euskarari laguntzeko aukera.

Galdakaoko Eguzkibegi ikastolak, bertara joateko autobusa antolatu du,
Galdakaotik 9:30ean irten eta 18:30ean bueltako bidea hartuko duena.

Gurutzeko frontoitik irtengo da autobusa.
Izena emateko azken eguna Maiatzaren 23a.
94 456 02 64 deitu edo Barandiaran AEK euskaltegian izena eman.
Autobusaren prezioa: 8€ joan-etorria.

Berbalagun eta euskaltzale guztiok BOGA Ondarrura!!!

Maiatzaren 13ko afaria

2011-05-18T09:07:00.004Z

Maiatzaren 13an, Galdakaoko Pepeto kultur elkarte gastronomikoan, Arkaitzen eta Ainararen urtebetetzeak ospatzeko afaritxu bat egin genuen. Ainara sukaldari finak prestatu zuen txerri solomilloa muxikarekin labean.Uuuuummmmm....Sukaldari ikastaro bat eman beharko digu hurrengo batean, bene-benetan oso goxo egon zelako dena.

Afaria amaituta, gaurdian "Zorionak zuri" abestu genien biei eta oparien txanda heldu zen. Mendiko bisera Arkaitzi eta eskumuturrekoa Ainarari. Eta irtetzear genudela, denontzako opariak agertu ziren bapatean.

Sukaldariarentzat amantala. Mendizalearentzat linterna-txiskeroa eta irrati txikia. Pisua erosi behar duen bati itzulapikoa. Botea eraman behar zuenari karteratxoa. Dantza ikastaroan dabalen bati dantza egiteko zapatilak. Eta bukatzeko, terrazan piperrak dituenari ureztailua. Zenbat barre egin genuen...

Hurrengo afariaren data jarrita dago, beraz honetan egon ez zaretenok animatu hurrengora!

Mintza eguna 2011

2011-05-17T10:05:00.003Z

Urtero legez, heltzear dago berbalagunon eguna. Aurten Elizondon, Baztango hiriburuan, ospatuko dugu ekainaren 4an.

Beste eskualde eta herrietako berbalagunak ezagutzeaz gain, Euskal Herriko herri ederrenetakoa ezagutzeko aukera izango duzue.

Bazkaria: Paella, oilasko "pilotak", solomoa eta postrea izango da.
Menuaren prezioa: 20€
Izena emateko azken eguna: Maiatzaren 24a

Egitaraua:

11:00etan: Ongi etorria eta hamaiketakoa Merkatu plazan
12:00etan: Ibilaldi girotua
13:30ean: Mintza bermuta
14:30ean: Bazkaria Merkatu plazan/Baztango frontoian
16:00etan:Sari banaketa
16:30ean: Euskal erromeria

Autobusa Santutxu eta Getxoko Berbalagunek antolatu dute eta eurekin joango ginateke. Izena, ahalik eta azkarren eman. Sarrera 10€ inguru.

Erlaxatuta irten ginen ikastarotik bai

2011-05-17T08:54:00.004Z

Maiatzaren 13an egindako erlaxazio ikastaroko argazkiak dituzue ikusgai.

Fontso berbalagunak azaldu zigun arnasa hartzeak duen garrantzia. Hasieratik, elkar ezagutzen ez genuen jendea, bikoteka jarri gintuen eta elkarri begietara zuzen begiratzeko agindu zigun.
Honek tentsio sortzen zuela nabaritu genuen eta tentsio hori askatzeko indioen pare jarri gintuen zarata ateraz borobil bat eginez bueltaka geundela. Jarraian zentzumenen garrantziaz jabetu ginen. Begiak itxita entzumena eta gero ukimena landu genituen. Bikotearen eskuak eta hauen energia sentitzeko ariketa bat egin genuen ondoren. Masajeen antzeko zerbait izan zen, eta zeinen gustora egon ginen!
Amaitzeko, hasiera batean tentsio unea sortu zigun bikotea besarkatzeko esan zigun. Oso sentsazio goxoa izan zen eta emozioak adierazteko modu bikaina.

Hurrengorako badakizue, anima zaitezte eta etorri gurekin!

Erlaxazio ikastaroa

2011-05-09T08:11:00.004Z

Maiatzaren 13an, Galdakaoko Berbalagunek erlaxatzen
ikasteko ikastaroa eskainiko du.

Hitzordua 10:00etan izango da Barandiaran AEK euskaltegian eta sarrera debaldekoa duzue.

Egun bateko saioa izango da, ez da astero astero geratzeko taldea. Hala ere, Berbalaguneko dinamika ezagutzeko aukera polita da.

Iaz ikastaroan parte hartu zutenak oso pozik geratu ziren, berriz egiteko gogoz. Ez galdu aukera eta etorri gurekin, lanak, ikasketek edota etxeko gorabeherek eragindako antsietateari aurre egiten ikastera.

Zita ostiral goizean izanik, baliteke jende asko lanean egotea. Zaudete lasai, oraingoan etortzerik ez duzuenoi, beste egun eta ordu bat jarriko zaizue, jende kopuru nahikoa egotekotan. Beraz, ostiral honetan etorri ezin duzuenok ere izena eman, hurrengoa antolatzen hasteko.

Izena emateko hiru aukera dituzue:
- Barandiaran AEK euskaltegira etorri
- 944 564 119 telefono zenbakira deitu
- galdakao_berba@aek.org helbidera mezua bidali

Maiatzaren 8an, denok Senpererat.

2011-05-02T09:42:00.003Z

Maiatzaren 8an, Seaskak urtero iparraldeko ikastolen alde antolatzen duen Herri Urrats festara joateko proposamena.

Urtero bezala Lapurdiko Senpereko aintziraren inguruan antolatuko dira ekitaldi guztiak. Aukera ugari dago egun zoragarria pasatzeko: Kontzertuak, dantzariak, bertsolariak, haurrentzako txokoa eta abarrek borobilduko dute euskal giro paregabea izango duen eguna.

Aurtengo leloak, laku bat munduan du izena eta ateratako dirua, Kanboko Xalbador kolegioan egingo diren obren finantziazioan laguntzeko erabiliko da.

Etxebarriko euskara zerbitzuak, hara joateko autobusak antolatu ditu, irteera 8:30ean udaletxe ondoko bus geltokian izango da. Txartelak erosteko deitu Etxebarriko euskara zerbitzura (94 449 50 43) edo euskaltegira (94 426 28 02).

Egun polita pasatzeko eta euskararen alde egiteko aukera bikaina daukazue igandean. Beraz, gu ere euskararen aldeko laku horretan tanta bat izan gaitezen.

Badator Korrika!

2011-04-14T09:13:00.006Z

Apirilak aurrera darrai eta Korrika berarekin batera.

Bihar, azkenik, Galdakaora etorriko da euskaren aldeko uholdea.Milaka dira Korrikan parte hartzen duten euskalakariak eta gu ere bertan izango gara.

Beraz, zapatilak jantzi, indarrak hartu eta 21:30ean Aperribain itxoingo diegu Etxebarriko euskalakariei. Ibilbide osoa egin nahi ez edo ezin duzuenok jakin ezazue Aperribai atzean utzi eta Bengoetxe, Urreta, Bizkai Kalea eta erdigunean barrena ibiliko garela. Azkenean Zugutzutik irten eta Basauriri emango diogu lekukoa 22:20 aldera.

Galdakaok Korrika 17ri agur esango dio, baina Korrikaren aldeko ekitaldi handia egongo da Kurtzeko plazan: Lorebeltz eta Oxabi erromeria taldearen kontzertuak. Eta zintzurra ondo freskatzeko txozna ere plazan jarriko dugu.

Animo euskalakariok, animo berbalagunok, ordua heltzeko gutxi falta da eta!

Galdakaoko Korrika Kulturala

2011-03-29T08:49:00.004Z

Apirilean sartzeko bi egun baino ez dira falta; eta Korrika hasteko zortzi baino ez, beraz adi berbalagun Galdakaoko Korrika kulturaleko agenda eskaintzaz beteta dator eta.

Korrika ez da ibilbidera mugatzen, horregatik herri guztiek korrikaren aldeko eskaintza kultural zabala daukate. Zure herrian ere ez da faltako ondo pasatzeko ekintzarik, beraz, ondo irakurri eta zabaldu herrian.

Zuen neurrira egindako egitaraua:

Apirilaren 2an:
Goiz osoan Korrikaren aldeko kuestazioa eta kale musikariak. Korrika arropa erosteko mahaia ere egongo da.

Apirilaren 8an:
19.00etan Korrikaren aldeko pilota partidua, Kurtzeko frontoian, Adiskide Pilota elkartearen eskutik.

Apirilaren 9an:
10.00-13.00, Umeentzako puzgarriak, plaza gorrian.
14.30, Herri bazkaria Muguru zelaian (euria bada, Gandasegiko arkupeetan)
Koreografia txapelketa, Euskal kantuak.
Musika-dantza poteoa.

Apirilaren 10ean:
12.30, Andra Mari Dantza Taldeak Korrikaren aldeko dantza ikuskizuna, Kurtzeko plazan.

Apirilaren 15ean:
10.00 Korrika txikia
10.30 Mezua irakurri eta Maider Legarretak zuzenean Korrika kanta abestuko du Plaza Gorrian.
11.00 Haur dantzaldia, Plaza gorrian
17.00-19.30 Buruhandiak, musikariak, txokolatada eta txistorra Plaza Gorrian Barrengorri eta Pepeto elkarteen eskutik.
21.00 KORRIKA 17 dator Galdakaora!
22.30 Kontzertua OXABI eta LOREBELTZ, Kurtzeko plazan eta bertan Korrikaren aldeko TXOSNA

Asteazkeneko taldean badago bertsoloririk!

2011-03-28T09:47:00.003Z

Hemen duzue Korrikaren aldeko kopla lehiaketako Galdakaoko lehen bertso sorta.

Koplalariak asteazkeneko taldeko zenbait lagun dira(izenik ez dugu emango, eurek hala eskatuta). Hauek dira Euskalakari baten bizitza gaiari erantzundakoa:

1. Astero joaten gara

leku berdinera

Mutilak eta neskak

ondo pasatzera

2. Gure-Toki tabernan

bihurtu gara lagun

Eta berba eginez

ere berbalagun

3. Euskaldun barri gara

eta badakigu

Euskara goratzeko

hauxe behar dugu

4. Astero etortzen gara

mingaina astintzera

Pertsona ezberdinak

hizkuntza berbera

5. Gure hizkuntza polita

ezin dugu galdu

Hargatik merezi du

guztiok bultzatu

6. Berbalagun guztiok

elkartzen bagara

Ea zenbat euskaldun

gure herrian dan...

Euskalakari koplalari

2011-03-23T09:20:00.004Z

Berbalagunok, heldu da zuen bertsolari sena
erakusteko garaia. Seguru nago zerbait ikasiko zenutela sagardotegiko giro jatorrean.

Parte hartzaileak: AEKko euskaltegietako ikasleak zein praktika egitasmoetako lagunak.

Egin beharreko lana: 6 koplaz osatutako bertsoaldi bat idatzi.

Doinua: ama begira zazu, ikusi nuenean

Gaia: Euskalakari baten eguna

Saria: Afari edo bazkari bat sagardotegi batean, bi bertsolarirekin irabazten duen talde osoarentzat.Azken eguna: Apirilak 1.Nora bidali: Helbide honetaraEpaile lanak: Bertsozale Elkartea.

Oharra: Bertsoaldia idaztea eta bidaltzearekin aski da baina bertsolaritzan doinua ere ezinbesteko osagaia denez, baina koplak abestera animatu nahi zaituztegu; beraz, grabatu eta bidali. Bideoz iristen diren bertsoaldiek puntu gehigarri bat izanen dute.

Nola egin kopla: Neurria 7,6,7,6 da. Honek esan nahi du zazpi silaba izan behar dituela lehen puntuaren lehen zatiak eta bigarrenak sei eta honen azken silabak errimatu behar du bigarren zatiaren azken silabarekin. Adibidez:

Euskaraz mintzatzeko 7
elkartu ohi gara 6
Gora berbalagunok 7
ta gora euskara 6

Orain zuen txanda da. Ekin koplei!!!

2011ko Berbatxotx

2011-03-22T10:28:00.002Z

Martxoaren 19an Galdakaoko Berbalagunok ere bat egin genuen Enkarterriko, Ezkerraldeko, Meatzaldeko eta Aiaraldeko berbalagunek sagardotegiarekin zuten hitzorduarekin. Argazkian agertzen ez bagara ere, ez ginen urruti ibili, horregatik utzitako aztarna gehitu diogu argazkiari. Hamaika lagun, hamaika aztarna.
PAUSOZ PAUSO gelditu barik...
11:30ean mendebalde urrunetik etorritako lagunek hartu gintuzten eta zuzenean Astigarragara, Euskal Herriko sagardoaren hiriburura, abiatu ginen.
Autobusean sartu aurretik eskulan ikastaro laburra egin genuen, gerora aldean eraman genituen euskalakari pin erraldoiak egiteko. Eskerrak egin genituela, eskualdeak identifikatzeko, kolore ezberdineko pegatinak banatu zituztelako eta lau kolore baino ez zeudenez, guk nola ez? Galdakaotik ere ikus zitekeen bereizgarria eraman genuen. Sagardotegian zergatik jarri ote ziren musikariak gure ondoan? Kanturako gogotsu geundelako eta nahiz eta bazter batean egon, gure eztarri finetik ateratako kantak bertan zeudenen gozagarri izan ziren. Dantza ikastaroan ikasitakoa ere praktikan jarri genuen, bai sagardotegian, bai Hernaniko herriko plazan. Zer pentsatuko luke gure dantza irakasleak? Seguru barre egingo zuela, baina larunbatean denok egin genuen barre. Bertsoak ere entzun genituen, nahiz eta kalitate handikoak izan ez. Bukatzeko eskerrik asko Andra Mari Dantza Taldeak antolatutako espedizioko partaideei, euren autobusean eraman gintuztelako etxera. Hain gustura geunden, ezen zortzietan bueltatu zen taldeari esan baikenion gu bertan geratuko ginela tabernaz taberna. Buelta gogorra izan zen, hala ere baten bat ez zen etxera joan autobusak utzi gintuenean. Seinale ona zalantzarik gabe...bejondeigula.

Berbatxotx! Sagardotegira

2011-03-09T10:38:00.003Z

Martxoaren 19an Galdakaoko Berbalagunok ere Astigarragako Etxeberria sagardotegira! Hainbat eskualdetako berbalagunekin joango gara egun zoragarria pasatzeko asmoz. Oraindik lau leku libre geratzen dira, beraz mugi zaitez, izena emateko azken egunetan gaude eta.

Izena emateko galdakao_berba@aek.org -era mezua bidali edo deitu 675717530 telefonora. Anima zaitez kupelak gure zain gaude eta!

KORRIKArnabala

2011-03-09T09:20:00.003Z

Korrika apirilaren 7an, Trebiñun hasiko dela? bai, egia da, ez dugu inor nahasi nahi. Baina aurten Galdakaoko Berbalagunok, Korrika alternatiboa egin nahi izan dugu: KORRIKArnabala.

Arratsaldeko zazpietan, mozorroak prestatzeko euskaltegian geratu eta bederatzi eta erdietarako Someran bildutako jendea Goseren "pausoz pauso gelditu barik..." musikaz gozatzen hasi zen.

Korrika antolatzailearen agindupean pankartaren eta lekukoaren atzetik Euskalakari pin erraldoiak saltzen joan ginen tabernaz taberna. A ze arrakasta!

Argi geratu zen Euskal Herrian ez ezik, Mexikon eta Afrikan ere euskararen alde daudela. Elizak bi ordezkaria bidali zituen, Bengoetxea gotzaina eta AEBtik etorritako Gospel kantaria. Azeriak ez zuen borrokarako gogorik ezpata etxean utzi zuelako, baina petoa janztea ez zitzaion ahaztu. Sorgin batek bat egin zuen deialdiarekin eta pijamaz jantzita etorri zirenek ere nahikoa zalaparta sortu zuten, pijama etxean jantzita zutenen kalterako. Peluka, antifaza eta betaurreko erraldoiak petoarekin jantzi zuenik ere agertu zen "ika, ika, ika, KORRIKA" oihukatuz.

Laburbilduz, ederto batean pasatu genuen eta bide batez Korrikari lagundu genion, zer gehiago eska genezakeen?

Otsailaren 4an KORRIKArnabala.

2011-02-28T10:30:00.004Z

Galdakaon benetako Korrika apirilaren 15ean pasatuko den arren, Berbalaguneko kideok, egun handirako beroketa egitea pentsatu dugu.

Inauteriek ematen duten aukera aprobetxatuz, inoiz egin den Korrika kultura anitzena egingo dugu. Petoa jantzi(Aurreko urteetako petoa izan beharko da, edo norberak eskuz egindakoa) eta mozorrotu nahi duzun bezala. Adibidez: Korrikalari mexikarra, Korrikalari eskimala, Korrikalari andaluza...

Galdakaoko AEK euskaltegian 21:00etan geratu gara tabernaz taberna joateko.

Oharra: Petoa egiteko Korrika materiala behar izanez gero etorri euskaltegira.

Euskal dantza ikastaroa martxan

2011-02-10T09:53:00.005Z

Iepa berbalagun!

Heldu da gorputza mugitzeko garaia!
Aurten ere euskal dantza ikastaroa egiteko aukera paregabea duzue. Iaz izena eman zutenek errepikatuko dute, beraz, probatu ez zenutenok, badakizue zer egin.
Ikastaroa Otsailaren 11an hasiko da.
Hitzordua ostiralero 17:00etan Andra Mari dantza taldeko lokalean.
Anima zaitezte!

Bertso eskola / tailerra

2011-01-28T11:04:00.002Z

Iepa berbalagun!

Aurten ere gogoraraziko dizuegu baduzuela bertsotan ikasteko aukera.
Eskolak astelehenetan eta ostegunetan 20:45etik aurrera AEKn izaten dira eta bost laguneko talde jatorrak osatzen du klasea.
Askok pentsatuko duzue ez zaretela bertsotan egiteko gauza izango, bertsotan zuzen zuzen egitea ere ez da gure asmoa. Gure helburua da bertsolaritzaren mundua apur bat ezagutzea eta bide batez bertso sinpleak egiten ikasten badugu PRIMERAN!!!
Berdin dio bertsolaritzaz zenbat dakizun, berdin dio zein den zure euskara maila, kontua da ondo pasatzea eta batez ere euskaraz egiteko beste aitzakia ederra izatea.
Beraz bertso eskolan ez, baina ikastaro edo tailer batean parte hartzeko prest bazaudete mezu bat bidali galdakao_berba@aek.org helbidera edo faceboocera.
Batek daki, agian Mailen Lujanbiori txapela kentzeko dohai ezkatua duen bertsozalea dago gure artean ;)Anima zaitezte ez zaizue damutuko eta.

Korrika denda!

2011-01-24T09:43:00.003Z

Korrikaren aldeko arropa erosi nahi baduzue, hemen duzue helbidea eta ordutegia. Anima zaitezte eta ez galdu erosteko aukera, Korrikak hori eta gehiago merezi du eta. Pausoz pauso gelditu barik, pausoz pauso maitatu ari,PAUSOZ PAUSO EUSKALAKARI!

2011-01-21T12:16:00.002Z

Hiztegiak aurten bi adiera dituen hitz berria dakar, Euskalakari.iz./izond.
1.Euskara maitatzen, ikasten eta erabiltzen duena.
2.Euskara erabiltzeko helburuz, euskara maitatuz euskara ikasi eta hobetzeko ahaleginak egiten dituena.Horretarako urratsak ematen dituena.

Zuen argazkia agertu beharko litzateke esanahiaren ondoan, zuek baitzarete urratsak egunero ematen dituzuenak, euskara ikasteko ahaleginean.
Berbalagunok, pausoz pauso gelditu barik, pausoz pauso maitatu ari...PAUSOZ PAUSO EUSKALAKARI

Euskal jaia abenduaren 17an

2010-12-09T10:19:00.002Z

Kaixo berbalagun!

Berriro ere euskaraz gozatzeko aukeraren berri eman nahi dizuegu. Hego Uribeko AEKk antolatu duen Euskal Jaiaren kartela duzue ikusgai. Menu dotoreari bertan egongo den giroak lagunduko dio eta afalostean Paristik etorritako artista izango dugu. Nor izango ote da? Jakin nahi baduzu ez galdu aukera eta etorri gurekin, ez zaizu damutuko.

Izena emateko epea abenduaren 13ra arte utziko dugu.
Lekua Galdakaoko AEKn bertan.

Anima zaitez!!!

Atera arbela kalera!

2010-12-01T12:01:00.003Z

BERBALAGUNEN BAZKARITXOA!!

2010-06-10T16:14:00.004Z

Ekainaren 2an , astearte eguerdietan elkartzen den taldetxoa eta asteazken goizetan elkartzen dena bate egin eta bazkaritxo ederra egin genuen.

Aukera polita izan zen, elkar ezagutzen ez zuten askok elkar ezagut zezaten. Giro politean bazkaldu ahal izan genuen, barre eta irrien artean.

Nahiz eta ia denak emakumeak izan, gizontxo bat ere izan genuen gure artean. Espero gure Fontxo ez izutzea eta gurekin bueltatzea.

Eta ordaintzeko ordua ere heldu zen!!! Hemen ezin ihes egin!!! Beitu ze polito egiten dituzten kontuak gure neskek!!!

Ederto bazkaldu genuen; beraz, berriro ere elkartuko gara!!!

UDAKO BARNETEGI IBILTARIAK

2010-05-25T14:51:00.002Z

Udako eskaintzaren barruan, aurton ere, praktikatzeko barnetegiak antolatu ditu AEK-k. Bi dira aurtengo eskaintzak:

Barnetegi ibiltaria (oinez) Lehen aldiz, uztailaren 3tik 18ra Euskal Herria mendirik mendi zeharkatuko dugu mutur batetik bestera.

Barnetegi ibiltaria (bizikletaz) Aurtengoa 10. edizia izango da eta ziurrenik, uztailaren 17tik 31ra Euskal Herriko hainbat txokotan ibiltariko txirrindulariak topatuko dituzue.

Barnetegi hauen prezioa: 450 euro dena barne
Izena ematea: ibiltaria@aek.org edo telefono hauetara:

barnetegia oinez: 663 030 568 (azken eguna: ekainaren 24a)
barnetegia bizikletaz: 630148 159 (azken eguna: uztailaren 8a)

MENTZAEGUNA 2010

2010-05-25T14:45:00.002Z

Berbalagunok ere badugu gure eguna ; Berbalagun eguna edo Mintza eguna. Ondo pasatzeko, euskaraz gozatzeko eta jendea ezagutzeko aukera paregabea dugu egun honetan.

Aurtengoa Arrasaten izango da,ekainaren 6an, eta jende asko espero dugu, zorionez, gero eta berbalagun gehiago baitago. Galdakaotik ere, urtero bezalaxe bertara joango gara. Bertara joateko autobusa antolatzen saiatzen ari gara, beraz ez galdu aukera hauxe; lortuz gero honen prezioa 20€koa izango litzateke.

Egitaraua hemen duzue:

11:00etan Ongi etorri berbalagun guztioi eta hamaiketakoa denontzat plazan.

12:00etan Ibilaldi gidatua Arrasatetik

13:30etan Kalejira ( berbalagun guztiok dantzan herria zeharkatuko duen kalejiran)

14:30etan Bazkaria herriko plaza nagusian (20 eurotan)

15:30etan Sari banaketa berezia

16:00etan Erromeria KATAIA taldearekin

Bazkari txartelak eta autobusa ordaintzeko azken eguna maiatzaren 26a. Izena ematearekin batera (idatzi telefonoa),ordaindu beharko da.

Gogoratu! bazkaria + autobusa: 30 euro

IBILALDIA 2010

2010-05-25T14:33:00.004Z

Bermeon ospatuko da maiatzaren 30ean IBILALDIA 2010, MARIGORAN KIKUNBERA lelopean.

Marigoran Kikunbera

Bermeoko 2010eko IBILALDIAk hedatuko dauan mezuaren oinarria da “Marigoran Kikunbera”. Gorantza datorren marean guk kikunbera egiten dogu.

Itsasoari lotutako herria izanda gorantz datorren itsasoko marea aukeratu dogu modu metaforiko batean ikastolen inguruko mugimendua definitzeko. Ikastolen marea, euskeraren marea…mundua bera dator gorantz, beran barrikuntza eta aldaketa guztiekaz. Eta horren aurrean, bigarren berbeagaz, guk, kikunbera egiten dogu; buruz murgiltzen gara marea horretan. Honek, konfiantza erakusten dau, ez dogu eta egingo kikunbera konfiantza bako uretan. Bestetik, inplikazioa iradokitzen dau, datozen “ur barrietan” bustitzeko jokaera, urrunetik begira egon beharrean parte hartuz.

Bestalde, marea gorantz dator, ez dau ondiño goia jo. Honela, zabalik izten dogu bakotxaren aportazioa marea horretarako gehikuntza izan daiten.

“Kikunbera” berba bera da beste klabeetako bat, geure keinu berezia. Batetik, Bermeo bertoko adierazpide bat dalako, eta horrek, indarra eta zehaztasuna emoten deutso leloari.

Kikun

Bermeoko IBILALDIA 2010eko logoa Kiku izeneko bost puntadun izarra da, itsasoko izarra. Bere bost besoak Ibilaldia osotasunean zabalduko daben bost bideak dira:

ITSASOA: atal honek natura hartuko dau baitan, berarekiko errespetua eta ezagutza, ingurumenak Bermeon daukan presentzia adierazkorrena aurkeztuz, hau da, itsasoa.
IKASTOLA: ikastolaren izatea eta giroa islatuko dauz atal honek, bere baloreak eta proiektua, bertako ikasleak eta irakasleak, gurasoak eta langileak oro har, talde haundi eta berezi bezala aurkeztuz.
KULTURA: atal honek kultur adierazpide guztiak bereganatuko dauz. Iraganetik edan eta geroa sortzen dauan herri bat. Bizirik mantentzen dan herri anitz bat.
IZARTU: guztion parte hartze aktiboa bultzatuz, herri eta eskualde mugimendua bizteko atala. Ideiak izar bizi bihurtuz, lo egozan indar eta antolakuntzak izartuz.
EUSKEREA: euskerea da gure argia, gure itsas argia kasu honetan. Euskereak egiten gaitu euskaldun, ezbardin eta bakar munduan. Erabili eta bizi egingo dogu.

Informazio gehiago nahi izanez gero egin klik hementxe

GORPUTZEKO ENERGIAK OREKATZEKO SAIOA

2010-05-25T14:14:00.004Z

Pasa den ostiralean, maiatzak 21, gure gorputzeko energiak orekatzeko aukera izan genuen.

Bertan ikusi ahal izan genuenez, gure gorputzeko min asko gure gorputzak berak sortzen omen ditu. Eta gure gorputza erabilita sendatzen ikas dezakegu modu erraz baten.

Kontua da, gu geu energia garela; arnasten duguna, energia dela... dena dela energia. Baina energia hori orekatzen ikasi behar dugu, batez ere arnasaren bidez. Eta horretarako hainbat ariketaxo erraz egin genituen. Hementxe dekozue horietako bat.

Erlajazioa egiteko aukera ere izan genuen. Meditazioak oso zaila ematen du, baina arnasa ondo erabilita, ematen duena baino errazagoa dela ikusiko dugu.

BERTSO BAZKARIA!!!

2010-05-19T08:54:00.003Z

Maiatzaren 22an, larunbata, bertso bazkari ederra ospatuko da Galdakaon. Bertan Amets Arzallus eta Arkaitz Estiballes izango ditugu bertsotan eta Asier Martin gaijartzaile lanetan.

Giro polita, eta, noski, euskalduna antzaman ahal izango da herriko kaleetan zehar.

Zer diozu? Oraindik ez duzula sarrera erosi? Zeri itxoiten zabiltza ba? Leku barik geratuko zara!

Sarrerak 15 euroan daude salgai Galdakaoko Barandiaran Aek Euskaltegian,Galdakaoko Udal Euskaltegian, Zurrut Tabernan, Guzur Aretxa Tabernan eta Ganguren Tabernan.

Bertso bazkari hauxe Erduzie Euskara Elkartearen 3.urteurrena ospatzeko egingo da; beraz, anima zaitez eta ERDU GUGEZ!!!!

KORRIKA OUTLET

2010-05-19T08:45:00.003Z

Maiatzaren 21,22 eta 23ko asteburu honetan, KORRIKA OUTLET zoragarria izango da Basauriko Bolintxu Euskaltegian.

Ostiralean zabalduko ditu ateak Korrika 16 materiala salneurri barregarrietan izango dituelarik. Hauek dituzu bertara hurbiltzeko ordutegiak:

Ostiralean 16:30etik 21:00etara
Larunbatean 10:00etatik 21:00etara
Igandean 10:00etatik 14:30era

Ez galdu aukera paregabe hau eta hurbil bertara!!! Ziur mauka zoragarriak topatuko dituzula!!!

TELP IKASTAROA

2010-05-13T15:17:00.003Z

Iaz bezalaxe, aurtengoan ere, ERDUZIE Euskara Elkarteak TELP ikastaroa antolatu du hurrengo 3 asteburuetan gauzatuko dena.

TELP tailerrak bakoitzak bere buruari honako galderak egiea planteatzen dio:

Zenbat biderrez hasi zara euskaraz eta erdaraz bukatu duzu?

Horrelako zenbatetan sentitu zara deseroso?

Horrela jokatzen duten euskaldunak tailer honetan parte hartzera gonbidatzen dituzte. Tailerrak maiatzaren 15ean , larunbata, hasiko da martxan; eta hiru larunbat iraungo du. Beraz maiatzaren 15, 22 eta 29an gauzatu da, goizeko 10:00etatik 13:00etara Galdakaoko Torrezabal Kultur Etxean.

Benetan tailer interesgarria eta DEBALDEkoa da; beraz, anima zaitezte eta eman izena.

Izena emateko edota informazio gehiago jasotzeko jarri beraiekin harremanetan helbide honetan

BASAURIKO HITZ GURUTZATUEN I. TXAPELKETA

2010-05-12T15:49:00.002Z

Datorren maiatzaren 29an, larunbatez, Basauriko hitz gurutzatuen I. txapelketa egingo dute. Txapelketa bada ere, euskaldunon eta euskara ikasleon arteko topaketa dela esan daiteke, giro alaian eta patxadan elkar ezagutzeko aukera izango baitute egun horretan.
Izena ematea eta informazioa: Basauriko Bolintxu AEK Euskaltegian edo 944.408.264 telefonoan.

AZTERKETQAK DIRELA ETA...!!! MASAJE METAMORFIKOA!!!

2010-05-10T14:27:00.003Z

Datorren larunbatean, maiatzaren 15ean, HABE azterketak daudela eta jendea oso urduri dabil. Beraz, hauek lagundu nahian, ostiralean, maitzaren 14an, goizeko 9:30ean elkartuko gara berriro ere masaje metamorfikoa praktikatzeko.

Aurrekoan ederto ibili ginen eta guztiz erlaxatuta atera ginen bertan elkartu ginenok. Ea oraingoan ikasle urduri hauek baretzeko kapaxak garen!!

Anima zaitezte!!! Benetan! Masaje mota honek daukan indarra nabarituko duzue eta!!

Izena emateko deitu 94 456 41 19 telefonora edo idatzi hona.

HERRI URRATS 2010

2010-05-04T14:47:00.002Z

Hurrengo igandean, maiatzaren 9an, Herri Urrats ospatuko da Senperen. Herri Urrats zer den ez dakizuenontzat hona hemen azalpentxoa:

1. HERRI URRATS, EUSKARA ETA IKASTOLEN ALDEKO FESTA

Herri Urrats, euskararen alde antolatutako festa da. Senpereko aintziraren inguruan egindako elkarretaratze bat, urtetik urtera harrera hobea izaten duena, eta ikastolen lagun eta euskararen babesleen hitzordu ezin hutsegina bilakatu dena.

Praktikan, Herri Urrats ibilaldi bat da, Senpereko aintziraren inguruan antolatua. Zirkuitoaren itzulia egitea (4 km) ez da nahitaezkoa. Zirkuitoaren inguruan, ostatuak jateko eta edateko, animazioak (antzerkia, dantzak, musika, txontxongiloak, jokoak, indar jokoak, erakusketak, liburu eta disko salmenta...) eta lasai egoteko tokiak aurkitzen dira.

Urtetik urtera kultur mailako elkarretaratze handienetako bat bilakatu da festa hau, Euskal Herrian, baita Akitania mailan ere. Milaka jende etortzen da zazpi probintzietatik, baita hurrunagotik ere, Senpereko aintziraren inguru xoragarrian egun alaitsu hortaz gozatzeko, eta euskararekiko atxikimendua erakusteko.

Festa hori Euskararen inguruko elkartasunaren adierazgarri da. Euskaldunak, euskaldun ez direnak, Europako eta Munduko bizilagunak... elkarretaratzen dira, festa tarteko eta giro onean, goraki esateko :

"HIZKUNTZA GUZIEK MUNDUAREN HONDARREA ABERASTEN DUTE"

"DOALA EUSKARA LAU HAIZETARA"

Ibilbidea eta egun honetako egitaraua:

IBILBIDEA

EGITARAUA:

ARABA

10:00 Katalanak
11:00 Herri Kirolak
12:30 Mutxikoak
13:30 Herri Urrats kantuz
15:00 La mal coiffée
16:30 Bizardunak
18:00 Xutik

GIPUZKOA

10:00 Poliki
10:30 ASCA
11:30 Poliki
12:00 KSI
13:00 Dantzaz
14:30 Ander Lipus
15:00 Capoeira liberdade
16:30 Tipul eta putil

LAPURDI

10:00 Bertsolariak
11:00 Pil Pil
12:00 Mikel hats
13:30 Xabier San Sebastian
15:00 Garen
16:00 Jean Mixel Bedaxagar-Mixel Aroce

16:30 Abolicao Capoeira
17:00 Salsa berde

NAFARROA

10:00 Bostgehio
11:00 Bertsolariak
11:30 Sorotan Babies
13:00 Anari
14:30 Mutxikoak
15:30 Zea Mays
16:30 Abolicao Capoeira
17:30 Zezenaren taldea

HAURREN XOKOA
11:00 Oinak arin
12:00 bertsolari gazteak
14:00 Goloka park
15:00 Kiki Koko Moko

IBILBIDEAN ZEHAR
Zo-Zongó
Hankaluzeak
Ziganteak
Txarangak
Dantza taldeak

AEKkarparen 10. edizioa

2010-05-04T14:46:00.000Z

Iruñeko Donibane auzoan kokatuta dago Irrintzi AEK euskaltegia, urtero jaialdia prestatzen dute bertako auzoko euskaldunekin karpa handi baten babesean. Aurten X. AEKkarpa eginen dute, hori dela eta, egitarau zabala prestatu dute. Goizean futbito, dantzari txikien topaketa, AEKolinpiadak, ardo feria, kantuz, mus txapelketa, bazkaria, kalejira eta bueltan dantzaldia eta kontzertua. Ederra ezta?

Egun horretan bertan, Iruñean ere, Kontseiluak manifestazioa deitu du Nafarroan euskaraz bizitzeko eskubidea lelopean. Aukera paregabea duzu biak uztartu eta egun osoko plana egiteko.

Info+: 948 27 41 60 edo mezua bidali

NAFARROAN EUSKARAZ BIZITZEKO ESKUBIDEA

2010-05-04T14:42:00.003Z

Nafarroako euskalgintzak, tartean AEK-k, maiatzaren 15ean I ruñean egingo den manifestaziora deitu du. Euskarak Nafarroan bizi duen egoerarekin kezkatuta eta Nafarroako Gobernuak euskararekiko duen kontrako jarrera salatzeko manifestazioa antolatu dute Euskararen Gizarte Erakundeen Kontseiluak, euskalgintzako kideek eta norbanako euskaltzaleek. Nafarroan euskalgintzan diharduten talde eta norbanako ugarik agertu diote babesa manifestazioari.

AEK-k ideologia guztietako nafar guzti-guztiei manifestazioan parte hartzera dei egiten die. Deialdiarekin bat egiteko klikatu hemen

PINTXO TAILER ZORAGARRIA!!

2010-04-23T08:11:00.002Z

Ederto pasa genuen atzo, apirilaren 22an, Pintxo hotzen tailerrean. Arratsaldeko 18:30ean elkartu ginen 10 lagun AEK-ko gela batean, gure irakasle-sukaldariaren laguntzaz gure lanari ekiteko asmoz.

Esan beharra dago gure asmoa pintxo ezberdinak egiten ikastea zela, eta ez soilik zeintzu elikagai nahas daitezkeen elkarren artean. Ikusi ahal izan genuenez, muntaia ere oso garrantzitsua da.

Atzokoan bost pintxo ezberdin egin genituen eta denak gozo-gozo egon ziren. Noski bukaeran egindako lana dastatu behar zen, eta horretarako gogotsu agertu ziren danak. Meriendatsu polita egin genuen atzokoan.

Batzuk trebeago eta beste batzuk ez hain trebe... hurrengoan pintxo beroen tailerra. Ea hoberantz egiten dugun.

Egon adi! Pintxo hotzen tailerraren data zehaztu barik dago! Bai gutxi barru zehaztuko dugu.

PINTXO TAILERRA

2010-04-21T11:53:00.003Z

Bihar, apirilaren 22an, osteguna, pintxo hotzak egiten ikasteko aukera izango dugu.Arratsaldeko 18:30ean elkartuko gara AEK euskaltegian. Iñaki gure sukaldari maiteak bost pintxo hotz ezberdin zelan egin irakatsiko digu bihoarkoan. Gainera gure zalantza eta kexka guztiak bertan argitu ahal izango ditugu: elikagai hauxe zeinekin doa ondo, beste hauxe beste zeinekin nahastu ahal dut...
Gainera pintxoak bukatu ostean, egindakoa aprobetxatzeko asmoz, meriendatxoa egingo dugu. Haako pintxoak begien aurrean edukita zeinek ez du ba berehala jateko gogoa izango?

Anima zaitezte eta etorri gurekin! Izen ematea 5€ dira, materiala erosi ahal izateko. Eta animatuz gero deitu 94 456 41 19 telefonora edo idatzi galdakao_berba@aek.org helbide elektronikora.

NABARNIZ: MENDI IRTEERA ETA PARRILLADA

2010-04-20T20:05:00.002Z

Pasa berri den igandean, 2010eko apirilaren 18an, egun pasa egon gara Nabarnizen. Herri benetan polita Bizkaiko txoko txiki hauxe.

Bertan, goiz partean, mendi ibilbidea egiteko aukera izan genuen. Arrolako "castroa" ikusteko aukera ere izan genuen. Ezagutzen ez duzuenentzat aholku modura bertara hurbiltzeko gonbidapena luzatzen dizuegu. Leku benetan polita, nondik Urdaibai osoa ikus daitekeen.

Gainera Karmelo gidari izan genuenez, historia apur bat ikasi ahal izan genuen bertara hurbildu ginenok!

Paseotxotik bueltan bazkaria prestatzen hasi ginen. Hori bai zen usain gozoa!!! Baina Karmelok haragiari botatzen dion saltsaren errezeta sekretua omen da! Beraz Nabarnizera bueltatu beharko dugu holako saiheski gozoak berriro dastatu ahal izateko.

Ederto bazkaldu eta giro ederrean eman genuen bazkalostea. Baina paseotxoa egitea erabaki genuen. Eta hara nondik atetik atera bezain laster tanta lodi batzuk bisitan etorri zitzaizkigun. Baina ekaitzak bost minutu baino ez zituen iraun eta ,gu, paseotxoari ekin genion. Baseliza bat ikusi eta baserrira bueltatu ginen.

Baserrian bueltan geundela gure katalana maiteak, Dianak, eginiko tiramisua probatu ahal izan genuen askaltzeko.

Eskerrak paseotxoak egin genituen... bestela...

Beste baten ere bueltatuko gara... zein izango ote da hurrengoa? Agian Ereñozar? Egon adi ez gara luzaroan inguru polit horretara bueltatu gabe egongo eta!

AEK AFARIA!

2010-04-20T18:29:00.002Z

Apirilaren 16an AEK-k afaria antolatu zuen Galdakaon. Berbalagun ere bertara gonbidatuaizan zen, eta berbalagun batzuk bertara hurbildu ginen.

Arratsaldeko 20:00ak aldera elkartu ginen Zurruten eta gosea egiteko tragoxka batzuk hartu ostean, Ganguren-era joan ginen, ordurako tripazorriekaz genbiltzan eta.

Ederto baten afaldu genuen: janaria gozo-gozo egon zen eta berbaldi luze eta atseginak izan genituen. Baina ohartu gabe Ganguren izteko ordua heldu zen, eta penatuta bertatik beste tabernetara joan behar izan genuen.

Pena berehala pasatu zitzaigun musika entzun eta dantzatzen hasi ginenean. Ederto afaldu genuen, eta tripa beteta oheratzea txarra omen denez, etxeratu aurretik jandako guztia dantzatuz kanporatzea erabaki genuen.

Eskerrik asko AEK! Berbalagun hurrengoan ere bertan izango da zuekin!!

EUSKAL DANTZETAN GERO ETA TREBEAGO!!

2010-03-29T15:00:00.002Z

Pasa den ostiralean, berriro elkartu ginen A ndra Mari dantza taldearen aretoan, geure ikastarotxoari kaña emateko.
Bertan aurrekoan ikasitako dantzak errepasatu eta beste dantza bi ikasi genituen: Lantzeko Zortzikoa eta Zazpi Jausi.

Lantzeko Zortzikoa ikasteko aurrekoan ikasitako San Petrike dantzaren pausuak gogoratu genituen, dantza hauek biek antz handia dute eta, nahiz eta ez musika ez dantza bera ezberdinak diren. Ederto pasatu genuen eta izerditan blai bukatu genuen... buelta alde batera, buelta bestera...

Zazpikoa ikasteko aurrekoan ikasitako beste dantza baten pausuak izan genituen oinarri. Hala ere oraingoan musika astiroago doa eta errazagoa izan zen dena harrapatzea.

Oraindik baduzue gurekin dantzetan aritzeko aukera, beraz ez galdu minutu bat bera bez. ANIMATU ZAITEZTE!

MENDI IRTEERA ETA PARRILLADA

2010-03-25T14:10:00.007Z

Apirilaren 18rako plan itzela proposatzen dizuegu. Aek-k irteera polita proposatu, eta guk, noski, laguntzeko prest agertu gara. Baina ez soilik laguntzeko, baita ederto pasatzeko ere. Eguneko plana proposatzen dugu oraingoan, iada udaberrian sartuta gaudela, egunak gero eta luzeagoak direla ikusita... zergatik ez dugu udaberriak dituen kolore politak aprobetxatuko?

Eta horixe da egingo duguna! Nabarnizera joango gara egun pasa! Ezagutzen al duzue Nabarniz? Nabarniz, Bizkaian, Busturialdean, Markina eta Ereño artean dagoen herritxo bat da.

Apirilaren 18an bertara joan eta herria bera, bere inguruak eta bere "castroa" ezagutuko ditugu. Bertan gaudela Iluntzarrera igi gaitezke, Nabarnizeko mendirik altuena dugu iluntzar bere 728 metroekin.

Bere "castroa" ere bisitatu egingo dugu. Burdin Aroan eraikitako harresidun herria dugu hau. Bere harresiek babestu egiten zituzten garai hartako biztanleak. Gaur egun harresiak baino ez dira geratzen, herria bera desargetu baitzen. Baina gure herrialdea nolako izan zen ezagutzen laguntzen digute.Ibilbidetxua egin ostean, tripazorriak baretzeko, Karmeloren Baserrira hurbilduko gara. Bertan parrillada itzela ospatuko dugu!! Indarrak hartu beharko dira, egunak luzatzen doaz eta!

Animatu eta etorri gurekin! Ederto pasako dugu eta!

Informazio gehiago lortzeko edota izena emateko deitu 94 456 41 19 telefonora, edo idatzi helbide elektroniko honetara.

GORA BIHOTZAK !!! MUGITU GORPUTZAK !!!

2010-03-22T17:30:00.004Z

Dagoeneko udaberrian sartuta gaude eta udarako prestatzen hasi beharko dugu, ezta?
Negu hotz eta luze honek gure giharrak uzkurtuta utzi ditu, eta udaberriarekin batera hauek guztiak luzatzen eta aktibatzen hasi beharra dago!

Horretarako paseo talde berria sortu nahi dugu! Dagoeneko batzuk prest udari begira "bikini operazioa" egin nahian! Anima zaitez eta etor zaitez gurekin!

Astelehen, astearte eta ostegunetan Arantzilera itzulia egingo dugu. Arratsaldeko 5etan atera eta 6etarako bueltan egongo gara. Ibilbide polita eta atsegina lagunartean egiteko! Animo! IBIL ZAITEZ EUSKARAZ!!!

Informazio gehiago nahi izanez gero deitu 94 456 41 19 telefonora edo idatzi helbide elektroniko honetara.

DANTZA IKASTAROA MARTXAN DA!!!

2010-03-18T20:08:00.004Z

Pasa den ostiralean, martxoaren 12an, gure lehen saiotxoa izan genuen. Batzuentzako euskal dantzekiko lehen harremana izan zen, gehienentzako ia ia.

Hiru dantza ikusi, ikasi eta dantzatu genituen: Txulalai, San Petrike (edo ipurdi dantza) eta Zapatain dantza. Zubia dekogu bitarteko, beraz etxean praktikatu beharko da, datorren ostiralean ahaztuta ez izateko.

Esperientzia oso polita guztientzako, eta bereziki kanpotik Euskal Herrira etorritakoentzako; euskara ikasteaz gain, euskal ohiturak... eta, noski, dantzak, ikasten animatu baitzaigu gure Burgoseko Jimena.

Nahiz eta euskaldunak oso arraro dantzatzen dugun komentatu, oso gustura ibili zen; bai bera, baita beste guztiok ere. Eta denbora eta praktikarekin gure irakasle maiteak, Haritzek, aipatzen digun "soltura" hori lortzea espero dugu.

Hori bai, hauxe, euskara bezalaxe... praktikatu egin behar da ikasteko! Eta gu, ikastaro honekin gauza biak praktikatzeko asmoa dugu: euskal dantza eta EUSKARA!

Beraz, ez ezazu aukera hau gal! Animatu eta etor zaitez gurekin ostiralero! Ederto pasako dugu eta. Ea ikasturte bukarerako erromeria oso bat dantzatzeko kapazak garen!

GALDAKAOKO BERTSO TALDEA

2010-03-11T16:04:00.004Z

Bizkaiko hainbat herritan, 22 herritan hain zuzen, bertso eskolak dituzte bertsotan ikasi ahal izateko. Galdakaok, ordea ez dauka horrelakorik.

Galdakaoko Berbalaguni proposamen hau luzatu zaio: zergatik ez gara hainbat euskaldun bertsozale elkartzen bertsotan ikasteko? Ideia zoragarria iruditu zaigu eta , beti bezala, ekimen berri honetan parte hartzeko prest gaude.

Bertso talde bat osatzea da asmoa, bertsotan giro atseginean aritzeko eta , jakina, ondo pasatzeko. Bakoitzak bere maila izango du, baina horri ez zaio erreparatuko ; bakoitzak bere martxan ikasiko du eta.

Batek daki, agian hurrengo bertso txapelketaren finaleko bertsolariak hemen izango ditugu!

Dagoeneko batzuk izena eman dute... zergatik ez zara zu izena ematen hurrengoa?

Hona hemen proposamenarekin batera luzatu diguten bertsotxoa:

Gustoko badozu
bertsoa ta eukera

ta parrandazalea
bazara gainera

ez pentsatu birritan
hau da zure aukera

etorri zaitez gugaz
ondo pasatzera

Izena emateko edo informazio gehiago eskuratzeko deitu 94 456 41 19 telfonora, edota idatzi
gure helbide elektronikora

EUSKARAZETAMOL + BERTO EMANALDIA !!!

2010-03-09T10:42:00.003Z

EUSKARAZETAMOL

Sozial Antzokiak martxoaren 26an, arratsaldeko 20:30ean, Mikel Martinez & Patxo Telleriaren EUSKARAZETAMOL antzezlana eramango du Basaurira.

Euskarazetamol, EZ DOK HIRU Bikotetaroak "DIBERTIMENDUAK" izenaz bataiatu duen trilogiaren azken alea da. "Euskara Sencilloaren Manifiestoa"rekin hasi ziren eta ondoren "Larruaizetara" etorri zen. "EUSKARAZETAMOL" honekin zera erakutsiko dute: antzerkiaz pitorik ez duten arren, gutxienez hirurarte kontatzen badakitela.

Sarrera 8 €an

BERTSO EMANALDIA

Maiatzaren 7an, arratsaldeko 20:00etan, Basauriko Bertso Eskolak antolatuta, Bertso Emanaldi ikusgarria izango da Sozial Antzokian.

Bertan Maialen Ljanbio, Amets Arzallus, Jon Maia, Anoni Egaña, Unai Iturriaga, Sustrai Colina eta Arkaitz Estiballes ikusi eta entzun ahal izango ditugu.

Horrelako bertsolari kartela ez da egunero ikusten... beraz aukera aprobetxatu.

Sarrera 8 €an

Sozial Antzokiak ikuskizun biak, EUSKARAZETAMOL + BERTSO EMANALDIA, ikusi ahal izateko "BONO"ak jarriko ditu salgai 10 €an

EUSKAL DANTZA IKASTAROA!!!

2010-03-08T16:40:00.003Z

Martxoaren 12an hasita eta ekainaren 18a arte, Andra Mari dantza taldeko dantzari baten eskutik gure lehen pausuak eman ahal izango ditugu euskal dantzan.

Ikastaroa ostiralero izango da arratsaldeko 17:0etatik 18:00etara Andra Mariren dantza egoitzan.

Ea ekaineko azken afarirako jota, arin-arina, fandagoa... dantzatzeko kapazak garen!

Hori bai! Ederto pasako dugu zalantzarik gabe!

Izena emateko edo informazio gehiago jasotzeko, zalantzarik gabe deitu 94 456 41 19 telefonora edo idatzi galdakao_berba@aek.org helbide elektronikora.

Anima zaitezte!!!

UDALAK EKINTZA PROGRAMAREKIN OSPATUKO DU "MARTXOAREN 8A-EMAKUMEEN NAZIOARTEKO EGUNA"

2010-03-08T16:19:00.001Z

Aukeren Berdintasunerako arloa

Galdakaoko Udalak, Aukeren Berdintasunerako sailaren bitartez, ekintzak programatu ditu "Martxoaren 8a-Emakume langileen nazioarteko eguna"ren inguruan. Ekintzok, iragan otsailaren 19an hasi zituzten "Sar daiteke?"antzerki lanarekin.Proposatu dituzten ekimenen artean, antzerki lan gehiago, filmeen emanaldia (horien artean, "Agora" filmea, sarrera prezio bakarrean, bi eurotan) eta hitzaldi-eztabaida, baita martxoaren 1ean hasiko den emakume artisten erakusketa ere. Usansolo eta Aperribaik ere antzerki lana hartuko dute Aztiak taldearen eskutik.Martxoko lehen asterako, Emakumearen Nazioarteko Egunaren inguruan, hurrengo ekintzak proposatzen dituzte:

Martxoak 1-12:

ProBocArte, emakume artisten sarearen erakusketa. Torrezabal Kultur Etxea. Jendearentzako ordutegia: 11:00-14:00/17:30-20:30.

Martxoaren 9a:

"Cerezos en flor" filmearen emanaldia. Sarreraren prezioa: 2 euro. Torrezabal Kultur Etxean, 19:00etan.Martxoaren 11: Luntxa-eztabaida. Kurtzea frontoian, 18:15ean.

Martxoaren 12a:

"Negra" antzerki lana, Meridional konpainiaren eskutik. Prezioa: 5 euro eta, 3,5 euro prezio murriztua. Torrezabal Kultur Etxean, 19:30ean.

Martxoaren 16a:

"Ágora" filmearen emanaldia. Sarrera prezioa: 2 euro. Torrezabal Kultur Etxean, 19:00etan.

Martxoaren 18a: "Martxoak 8ko historiak" liburuaren aurkezpena. Lan hau emakumezko idazle batzuen egindako ekarpen pertsonalen emaitza da. Aurkezpena Arantza Urretabizkaiak egingo du. Torrezabal Kultur Etxean, 19:00etan.

Martxoaren 26a: Antzerkia "Jaque" Ohulari klown konpiniaren eskutik.Doako sarrera. Torrezabal Kultur Etxean, 19:30ean.

RITH 2010, GAELIKOAREN ALDEKO KORRIKA IRLANDAN

2010-03-08T16:04:00.002Z

Rith 2010 izeneko lasterketa burutuko dute Irlandan martxoaren 9tik 17ra bitartean. Belfasten abiatu eta, 1.600 kilometro egin, eta 250 herri eta 15 konderri zeharkatu ostean, Galwayn amaituko da, Patrick Deunaren eguna ospatzeko burutzen den jai egunaren baitan. AEK eta KORRIKA ofizialki gonbidatu dituzte antolatzaileek eta Dublinen egingo dute kilometroa.
Ideia Euskal Herriko Korrikaren berri izan zutenean bururatu zitzaien Rith 2010en antolatzaileei, eta ekitaldia hobeto ezagutzeko asmoz Tuterara etorri ziren pasa den urtean 16. Korrikaren hasiera ekitaldira. Orain, euren hizkuntzaren aldeko lasterketa abian jartzeko momentua heldu zaienean, Korrika eta AEK gonbidatu dituzte bertan parte hartzera. Hala, Edurne Brouard Korrika arduradunak eta Mertxe Mugika AEKren koordinatzaile nagusiak Dublin erdiguneko Patrick Street-en hartuko dute Rith 2010eko lekukoa martxoaren 11n. Iluntzeko zortziak eta hogeita bostean dute hitzordua 382. kilometroa egiteko. Dena den, karreran bertan parte hartu aurretik, arratsaldeko bostetan hasiko den ekitaldi ofizial batean izango dira AEK eta Korrikaren arduradunak.

Joan Rith 2010 web gunera

Ibilbidea ikusi

Kanta entzun
Gehiago irakurri...

Kaixo maitia, praktikatu nahi?

2010-03-08T16:00:00.002Z

kaixomaitia.com kontaktu edo harremanak euskaraz bideratzeko web ordaindutako zerbitzua da. Bertan euskarazko harremanak izateko eta gainerako lagunekin mezuak trukatzeko aukera dago.
Facebook-eko praktikatu AEKren lagunek hiru hilabeteko harpidetza osoa doan izango dute apirilaren 30era arte Facebook-en Kaixo Maitia taldearen zale eginez gero. Beraz, badakizu, facebooken sartu, egin praktikatu AEKren laguna eta topatu kaixo maitian zure laranja erdia.
Kaixomaitia.com zer den ikusteko hemen duzu bideo bat.

ASTEBURU BARNETEGIAK ADUNAN

2010-03-04T16:16:00.001Z

Iruñea inguruko AEKren euskaltegiek asteburuko barnetegiak prestatu dituzte udaberrirako. Lehenengoa martxoaren 12, 13 eta 14ko asteburuan izango da EGA edo 3. mailako ikasleentzat; bigarrena, apirilaren 16, 17 eta 18an 2. maila eta 1.B mailako ikasleentzat; eta hirugarrena, maiatzaren 7, 8 eta 9an 1.A mailakoentzat. Guztiak burutuko dira Adunako (Gipuzkoa) barnetegian, eta ikasleari 60 orduz euskaraz bizitzeko aukera emango diote, ostiral iluntzean hasi eta igande arratsaldean bukatuko den asteburuko planari esker.
Ikastaro hauek era eta toki guztietako ikasleentzat daude zabalik, euskaltegi edo akademia batean dabiltzanentzat zein ikastolan edo eskolan ikasi dutenentzat, edota bere kabuz edo klase partikularren bidez ikasten ari direnentzat. Hori bai, 18 urtetik gorako jendea bakarrik hartuko da. Asteburu osoa (janaria, lotarako lekua eta klaseak barne) 105 euroren truke

17. ESAERA ZAHARREN TXAPELKETA

2010-03-04T16:11:00.003Z

Esaera Zaharren Txapelketa arrakastatsuaren edizio berri baten atarian gaude, hamazazpigarrena, hain zuzen ere. Txapelketaren edizio hau apirilaren 17an izango da, igandearekin, eta ohi bezala, Sopelan.
Esaera Zaharren Txapelketa urtero-urtero egiten den egun osoko ospakizuna da, atsotitzak, bertsoak eta jaia ezin hobeto uztartzen dituena.
Txapelketak bi saio ditu: eguerdian kanporaketak herrian zehar eta arratsaldean finalak Ander Deuna ikastolan. Taldeka egiten da (2-4 kide, 16 urtetik gorakoak) eta bertsolariek botatzen dituzten bertsoak aurretik banatzen den zerrendako 100 esaeretatik zeini dagokion asmatzean datza.
Aurten, arratsaldeko saioan Miren Amuriza eta Anjel Mari Peñagarikano egongo dira. Bestalde, diru asko mingainez, poltsan bat ez da aurtengo txapelketako lema, krisi garai honetarako ezin aproposagoa, baina txapelketan banatuko diren sariak apartak dira: asteburua landetxe batean irabazleentzako, eta afaria bigarren, hirugarren eta laugarren geratuko diren taldeentzako. Gainera, beti bezala, partaide guztientzako oroigarriak egongo dira.
Izena emateko epea apirilaren 12an bukatuko da. Inskripzioa 12 eurokoa da eta bazkarirako txartela 18 eurokoa pertsonako. Izena emateko edo informazio gehiago eskuratzeko honako telefono zenbakietara deitu ahal duzue: 695 774 015 edo 618 574 445. Edo mezua bidali
edo jose-p@aek.org helbidera.

BERBA-ZIRKUS!!!BIDEOAK ETA GUZTI!!!

2010-02-19T21:35:00.002Z

Pailazo onen antzera dantzatu eta kantatu egin genuen. Eta, noski, Pirritx eta Porrotxen MAITE ZAITUT abestia ezin zen falta... nahiz eta eurek bezalaxe ez genuen egin, ederto egin genuen!

Dantzatu ere, gustura egin genuen. Jende mordoa elkartu ginen jira-bira, aurrera-atzera... dantza mordoa ikasi genituen, eta ederto pasatu genuen!

BERBA-ZIRKUS ZORAGARRIA!!!

2010-02-19T13:31:00.003Z

Pasa den ostiralean, otsailak 12, inauteriak zirela eta, BERBA-ZIRKUS zoragarria antolatu genuen. Ederto baten ibili ginen bertara hurbildutako guztiok. Bertan zirko aurkezle-dantzari zoragarria izan genuen, pailazo-bertsolari kañero-kañeroak, pailazo dantzari jator-jatorrak, eta hainbat musikari arraro: soinua jotzen zuen zomorro hezlea, txapela janzten zuen dultzainero pailazoa, soinuagaz trebea zen pailazo ileori kapelduna... eta beste hainbat pertsonaia zoragarri!

Baina zirkua denon artean osatu genuen. Nahiz eta bertsotan jakin ez, dantzatzen trebeak izan ez, eta instrumentuekin abilezia gutxi izan, danok hartu baikenuen parte. Zuok guztiok gabe zirko berezi honek ez luke zentzurik izango.

Denerik eduki genuen: hippy-ak, pitonisak, pailazo mordoa, antza lotarako gogoa zuten pijamaz jantzitako asko... Zirko itzela benetan!!!!

Eguraldia ez zen aproposena izan, kalean ibili ahal ginenean kalean ibiltzen ginen; elurra mara-mara zebilenean tabernetan babesten ginen... Eskerrik asko ere Galdakaoko tabernari askori, eurek ere gure zirkoa beraien taberna barruetan montatzen utzi baitziguten.

Eskerrik asko gugana hurbildutako guztioi! Eta hurbiltzeko aukerarik izan ez zenutenoi... hurrengoan izango da!!! Mila esker bihotz-bihotzez!!!

AUPA BERBA-ZIRKUS-A!!!!!

URTARRILEKO SKI IRTEERA!!!

2010-02-11T14:54:00.002Z

Larunbatean ederto baten ibili ginen elurretan gora eta behera, baina igandean oso eguraldi kaskarra izan zen. Lainopea egon zen eta ez piperrik ere ikusten. Dana dala kafetegian txokolate beroa hartzen ederto egoten zen. Hurrengoan gehiago egingo dugu!!!!
Hona hemen kafetegian grabatutako bideotxoa:

IGANDE BAT ELURRETAN!!!

2010-02-02T12:44:00.002Z

Urtarrilean asteburu pasa joan ginen eskiatzera. Otsailean elurretara joan nahi dugu berriro, baina oraingoan, bakoitzak bere eguna modu ezberdin baten planea dezake. Jendeak ez du zertan skiatzu behar, baina lagunekin, familiareki... eta, noski, berbalagunokin egun zoragarria pasa dezake elurretan.

Otsailaren 21ean joan nahi dugu, goizeko 7:00etan atera eta 19:30 aldera bueltan egon. Egun osoa aprobetxatu nahi dugu, baina berandu egin gabe.

Kartelean prezio guztiak agertzen dira, baina hala ere, hona hemen gauza bakoitzaren prezioa:

Autobusa: 10 € pertsonako.

Helduen forfaita: 28€
12 urtetik berakoen forfaita : 18 €
5 urtetik berakoen forfaita : debalde

Jendeak material propioa edukiz gero aukera egokia eramatekoa, bestela bertan aloka daiteke.

Baten batek monitorea hartzeko asmorik izanez gero, komentatu guri, taldean hartuz gero merkeago ateratzen da eta.

Izena emateko edota informazio gehiago eskatzeko deitu 94 456 41 19 telefonora, idatzi galdakao_berba@aek.org helbide elektronikora, edota pasa zaitez gure bulegotik ( Barandiaran kaleko aek-n).

ANIMA ZAITEZ!!!

BERBA-ZIRKUS KARNABALAK!!!!

2010-01-29T12:01:00.002Z

Karnabal, ihauteri, haratuste... izen pilo deitzeko, baita ospatzeko modu asko ere.
Aurten Galdakaoko Berbalagunok herria zirku handi bihurtzea erabaki dugu. Horretarako zirkuko pertsonaiak behar ditugu: lehoi hezle, trapezistak, pailasoak, aurkezleak, sarrera saltzaileak, bela gizona, emakume bizarduna, magoa... eta noski, zergatik ez, animaliak ere bai.

Otsailaren 12an, barikua, mugituko da gure zirku berezi hau Galdakaoko kaleetan zehar. Eta gurekin batera, normalean zirkuan ibiltzen ez diren beste pertsonaia batzuk:

Bertsolariak: Jokin Castaños eta Arkaitz Zipitria (giro bero bero jarriko dute hauek)
Musikariak: trikitilari, albokari, panderojole... (guztiok dantzan jarriko gaituzte
Dantzariak: sorgin dantza dantzatzen erakutsiko digute azken hauek.

Beraz, jakinaren gainean zaudete. nOtsailaren 12an, arrtsaldeko 20:00etan hasita Baserri tabernatik BERTSO-TRIKI-DANTZA poteoa egingo du zirku ikusgarri honek. Hori bai zirku euskalduna dugu hau!!!!

Ibilbidea honakoa izango da: Baserri, Guzur Aretza eta Somerako tabernak... eta Galdakaoko gure mozoilo parrandazaleak Txakilen bukatu dute (betiko lez).

Bertan ikusi nahi zaituztegu!!! Beraz, ERDU GURE ZIRKURA!!!!

Informazio gehiago nahi baduzue deitu 94 456 41 19 edo idatzi emaila galdakao_berba@aek.org
helbide elektronikora.

GALDAKAON ERE BERTSOTAN BLAI!

2009-12-15T13:27:00.002Z

Abenduaren 19an, larunbata, Gabonen sarreran gaudela aprobetxatuz askari-afari ezin hobea izango dugu arratsaldeko 20:30ean. Horretarako plater egokiagorik ez eta neguko tenperatura hotz hauen aurka aritzeko salda gozo-gozoa hartuko dugu. Baina ez edozein salda.

MENUA: BERTSO SALDA

Bertso salda on bat prestatzeko errezeta:

1. Osagaiak:
- 6 bertsolari puntakoak: Maialen Lujanbio, Amets Arzallus, An Mari Peñagarikano, Miren Amuriza, Aitor Mendiluze eta Unai Iturriaga.
- Gaijartzaile 1 : Arkaitz Estiballes
- Areto eder 1 : Galdakaoko Torrezabal Kultur Etxea
- Bertso gose dagoen publikoa (neu barne)
2. Prestaketa:
- Nahasi ondo osagai guztiak eta utzi bi ordutan su lasaian egosten
3. Emaitza:
- Bertso saio bizi ta gustagarri bat disfrutatu.

Prezioa: merke-merkea ( 4 € helduak / 3€ bazkideak, gazte txareta eta ikasleak)

ABENDUAREN 23an OLENTZEROREN ETXERA!

2009-12-01T11:52:00.003Z

Abenduaren 23an, Olentzero bera lanean egongo dela aprobetxatuz, lanik egin behar ez dugun heldu eta umeak Olentzeroren etxera bisitatzen joango gara.

Garairik aproposena leku hau bisitatzeko, Gabon garaian guztiz murgilduta egongo baikara ordurako.

Bisita gidatua izango da goizeko 9:30ean. Baina leku mugatuak daudenez ahalik eta arinen eman izen, bestela leku barik geratuko zarete eta.

0-2 urte bitarteko umeek ez dute ezer ordaindu behar, eurentzako dohainik baita. Beste guztiek 7 euro ordaindu beharko dute.

Informazio gehiago izateko edota izena emateko deitu 94 456 41 19 telefonora, edota idatzi galdakao_berba@aek.org helbide elektronikora.

EUSKARAREN NAZIOARTEKO EGUNA GALDAKAO, ABENDUAK 3 eta 4

2009-12-01T10:55:00.002Z

Galdakaoko Udalak, Euskara Zerbitzuaren bidez, datorren asteazkenean (abenduak 3) Euskararen Nazioarteko Eguna ospatzeko ekimen-programa bat antolatu du. Programa horren barruan, besteak beste, gazteentzako disko-festa bat dago, baita udal musika eskolako ikasleen ekitaldiak ere. Eskola horretako gela bereziak ere emanaldia egingo du.

Hurrengo egunean (abenduak 4) 2010eko egutegia banatzeak, Astondoa enpresak egingo duen su-festak eta Agirre lehendakariaren plazan taloa, txorizoa eta sagardoa emateak festa kutsua emango diote ospakizunari eta Gernika Folk taldeak girotuko du jaia.

EUSKARAREN NAZIOARTEKO EGUNA

Abenduak 3, Euskararen Nazioarteko Eguna
Diskapazitatearen Nazioarteko Eguna
Agirre lehendakariaren plaza.

18:30ean, Aurkezpen-ekitaldia
Udal musika eskolako ikasleen saioa.
Musika eskolako gela berezikoen musika-emanaldia.

19:00etan, Disko-festa
- DJ Animatzailea
- Jokoak, abestiak, batuka…

Abenduak 4, Euskararen Jaia
Agirre lehendakariaren plaza.

18:00etan, 2010eko egutegia banatuko dugu.
«Zuztarretatik ahora» egutegia emango diegu herritar guztiei, karpan.

19:00etan, Su festa, Astondoa pirotekniaren eskutik.

19:15ean, Taloa, txorizoa, solomoa, hirugiharra eta
sagardoa guztientzat.

Animazioa, Gernika Folk
udal musika eskolako trikitixa eta txistulari taldeak

Animatu! Aukera paregabea euskaraz gozatu eta bide batez euskararen normalkuntza aldarrikatzeko!

EUSKARAZ HAZI, EUSKARAZ IKASI ETA EUSKARAZ BIZI NAHI DUGULAKO!!!

EUSKARAREN EGUNA! BILBON EUSKARAZ BIZI!

2009-11-30T10:02:00.004Z

Euskalgintzako eta kulturgintzako zenbait eragilek deituta, abenduaren 3an Euskararen Nazioarteko Eguna ospatuko dugu Bilboko kaleetan.

Bada garaia egun hau berreskuratu eta, harrera instituzional hutsetan geratu barik, bilbotarrak eta bizkaitarrok kalera irten gaitezen gure hizkuntzaren eguna behar bezala aldarrikatzera eta gozatzera.

Horretarako hemen doakizue egun horretarako egitaraua:

18:00etan Plaza Barrian, umeentzako jolasak, puzgarriak...

19:00etan Zazpi kaleetan barrera, fanfarreak, trikitilariak, albokariak...

20:00etan Plaza Barrian, Gaztedi dantza taldea, Andres Urrutiaren eskutik Euskaltzaindiko egoitzatik EUSKARAREN PREGOIA, bertsolariak, abesbatza...

Animatu eta etorri gurekin, ondo pasatuko dugu eta. Bide batez euskaraz bizitzeko eskubidea aldarrikatuko dugu.

OHEAN antzezlana Torrezabalen!!

2009-11-26T17:29:00.003Z

Abenduaren 11n, 21:00etan Maskarada konpainiaren "OHEAN" antzezlana izango da Torrezabalen. Prezioa 6 eurokoa izango da, baina taldean joaten bagara prezio murriztua izango dugu, 4,5 eurokoa.
Sinopsia:

Taberna batean elkar ezagutu eta handik ordu batzuetara, gizon batek eta emakume batek gela hartzen dute hotel merke batean sexu gau bat pasatzeko elkarrekin. Ez dakite ezer elkarren gainean, ezta bestearen izena ere, eta egun horren ostean ez dute berriro elkar ikusiko. Sexuaren ostean arrotz bi hauek ohartzen dira halako kimika bat sortu dela haien artean. Berbetan hasten dira eta, berez-berez, euren iragan eta intimitaterako ateak zabaltzen dizkiote elkarri. Euren kontakizunetan oroitzapenak eta ametsak tartekatzen dira, gezurrak eta egiak, gurariak eta beldurrak, zintzotasuna eta traizioa, maitasuna eta gorrotoa. Gauean barrena nahastuz doa dena.

Itxura ederra dauka, eta gainera, neguan kalean den hotza kontuan hartuta, plan polita izan daiteke.
Libre joateko aukera beti daukazue. Oraingo honetan animatu eta danok elkarrekin joan gaitezke. Bide batez, prezio murriztua gozatu ahalko duzue.
Gurekin harremanetan jartzeko deitu 94 456 41 19 telefonora, edo idatzi galdakao_berba@aek.org helbide elektronikora.
Anima zaitezte!!!

BERRIA %50 MERKEAGO mintzaparaktika partaideentzat!

2009-11-26T10:40:00.002Z

Mintzapraktika egitasmoetako partaidea bazara (mintzalaguna, berbalaguna, mintzakidea…) AEK-k BERRIArekin duen akordioari esker, asteburuetan zure kioskoan %50 merkeago jaso dezakezu egunkaria.

Horretarako zure datuak hemen bete eta kioskoaren izena eta helbidea idatzi. Datuok konprobatzeko jarri zein egitasmotan parte hartzen duzun.

TXALAPARTA IKASTAROA!!!

2009-11-26T10:32:00.003Z

Urtarrilean txalaparta jotzen ikasteari ekingo diogu! Barandiaran aek euskaltegian elkartuko gara, ostiraletan, ziurrenik 18:00ak aldera, Euskal Herriaren erakusgarri den txalaparta jotzen ikasteko.

Musika tresna berezia denez, taldea oso murriztua behar du izan; beraz, plaza mugatuak egongo dira. Animatzen bazarete ahalik eta lasterren eman izena, bestela leku barik gera zaitezkete eta.

Informazio gehiago izateko edota izena emateko deitu 94 456 41 19 telefonora, edo idatzi galdakao_berba@aek.org helbide elektronikora.

AUTOMAKILAJE IKASTAROA DEBALDE!!!

2009-11-25T15:39:00.003Z

Joan zaitezte ordu libreak hartzen abenduaren 11 eta 18an, ostiralez, automakilaje ikastaroak izango baititugu debalde. Bertan aurpegia zaindu, gure aurpegiari ondo datorkion makilajea, eta makilatzeko teknikak eta moduak ikasiko baititugu.

Bi egunetan egingo da ikastaroa:

Abenduaren 11n, goizeko 9:30ean, EGUNEKO makilajea landuko dugu. Eguzki izpien pean polit eta lirain egon ahal izateko.

Abenduaren 18an, goizeko 9:30ean, berriz, GAUEKO makilajea landuko da. Parranda, afari... eta horietara guztietara nor baino dotorago joan ahal izateko.

Ez ezazu aukera gal! Hori bai, leku mugatuak daude, beraz, eman ezazu izena ahalik eta arinen.

Izena emateko deitu 94 456 41 19 edo bidali emaila galdakao_berba@aek.org helbide elektronikora.

ABENDUAREN 4an DURANGOKO AZOKARA!!

2009-11-25T15:26:00.003Z

Urtero bezalaxe, abenduko zubi zoragarri honetan, Durangon diska eta liburuen azoka ospatuko da. Bertan azka bera ez ezik, beste hainbat ekitaldi ere egongo da.

Azoka larunbatean hasiko da berez, baina ostiralean, taldeentzak zabalik egongo da. Berbalagunok bertara hurbilduko gara, beraz, animatu eta etor zaitez gurekin. Azoka ikusi, durangotik bueltatxoa egin, pintxoren bat jan indarrak hartzeko... eta, noski, ederto pasatu.

Momentuz ez dugu hitzordua zehaztu, baina joan pentsatzen... Ahalik eta lasterren esango dizuegu non geratuko garen, nola eta zein ordutan joango garen... Horrela denak batera joan ahal izateko.

Ez ezazu aukera hau gal! Etor zaitez gurekin!

AINTZINAKO EGIPTO

2009-11-25T15:20:00.002Z

Urtero bezalaxe "Planeta Basauri"-k herri eta kultura bat ekarri du aurtengoan ere Basauriko herrira. Aurtengoan Egiptoren txanda izan da. Arizko dorretxean aintzinako Egiptoren inguruko hainbat eta hainbat gauza ikusi eta entzun ahal izango ditugu.

Bertara edozein momentutan hurbil zaitezkete! Baina bisita gidatua euskaraz jaso nahi baduzue etor zaitete gurekin ostiral honetan, azaroaren 27an, goizeko 10:00etan.

Bertan erakusketan dagoenaren inguruko azalpentxoa euskaraz jasoko dugu. Informazio gehiago jaso nahi baduzu, edo gurekin etortzera animatzen bazara, deitu 94 456 41 19 telefonora edo bidali emaila hona .

MASAJE METAMORFIKOA

2009-11-20T16:13:00.004Z

Hainbat lagun bildu gara masaje metamorfikoa zer zen jakin nahian... eta praktikak eraginda jakin izan dugu. Pertsonok , izaera fisiko, psikiko, etereo eta energetikoa dugu. Energia gara eta energiak mugiarazten gaitu. Baina energia hori blokeatuta badago (hainbat gauza medio direla), gure gorputz fisikoa horren erantzule izaten da. Askotan gaixotuz ematen digu erantzuna.
Masaje metamorfikoak energia blokeo horiek desegiteko balio digu. Elkarri masaje sinple eta gozo batek zenbat onura ekar ditzakeen ikusi dugu gaur goizean.

Hainbat azalpenen ostean masajeak egiteari ekin diogu.

Baina ezin dizuet dena kontatu. Hala ere. lasai! Gehiagotan egingo dugu eta.

Batzuei burua eragin badizu honek, hurbildu eta hurrengo saiora etorri.

EUSKAL DANTZA IKASTAROA

2009-11-05T16:41:00.002Z

Abenduan hasi eta ikasturtea bukatu arte, ekaina arte, ostiralero dantzan ikasi nahi baduzu, hemen duzu euskaraz egiteko aukera paregabea.

Ostiraletan arratsaldeko 18:00etatik 19:00etara Galdakaoko Barandiaran AEK euskaltegian dantza ikastaroa izango da.

Ikastaroan izena emateko: AEK euskaltegia, Udal Euskaltegia, 94 456 41 19 telefonoa edota galdakao_berba@aek.org helbide elektronikoa.

Ikastaroaren prezioa 50 eurokoa izango da.

Animo! Etorri gurekin! Ederto pasatuko dugu!

TRIKI-POTEO EUSKALDUNA

2009-11-05T16:31:00.002Z

Datorren asteko ostiralean, azaroak 13, triki-poteo euskalduna egingo dugu. Trikitixa, panderoa eta beste musika instrumenturen bat ere entzun ahal izango dugu Galdakaoko kaleetan zehar.

Baina poteoa hasi baino lehen, indarrak hartzeko, meriendatxoa egingo dugu Galdakaoko Barandiaran euskaltegian. Bertara zuek guztiok gerturatzea espero dugu. Hori bai, gerturzteko asmorik duzuenoi gauza bat baino ez dizuegu eskatzen: merienda guztiontzako hel dadin zenbat egongo garen jakin behar dugu, beraz eman izena.

Izena emateko, beti bezala: aek euskaltegian, udal euskaltegian, 94 456 41 1 9 telefonoan edota galdakao_berba@aek.org helbide elektronikoan. Izena emateko azken eguna azaroaren 12 izango da.

Etorri gurekin!

AZAROKO GALDAKAOKO EUSKARAREN AGENDA

2009-11-05T16:18:00.005Z

BERBALAGUNAK ARTXANDAKO FUNIKULARREAN

2009-11-03T19:51:00.011Z

Astearte honetan euskal museora joateko asmoa genuen, baina gauza batzuk direla, besteak direla... azkenean plan aldaketa egon zen. Ez pentsatu euskal museora joango ez garenik, hurrengo baten joango gara. Ez soilik euskal museora! Gure asmoa Bizkaiko hainbat eta hainbat museo eta leku berezi bisitatzea da, horien artea: euskaren etxe, arte ederretako museoa, enkarterrietakoa... eta beste asko.

Museoak alde batera utzita herriak ere ezagutzeko asmoa dugu, hainbat berbalagunek, euskaldun askoren antzera, oporrak Euskal Herritik kanpo pasatzen baitituzte etxe ondoan zer daukaten ahaztuta. Eta Euskal Herriak gauza izugarri politak ditu, bizitzan gutxienez behin bisitatu behar direnak.

Gaurkoan Artxandara joan gara, eta hona hemen gure ibilaldia:

XIX. mendearen amaiera aldean eta XX. mendearen hasieran, bilbotar asko Artxanda mendira joaten ziren egun-pasa atseden-giroan. Kasinoa eta zenbait txakolindegi zabaldu zituzten han eta jendea hara joaten zen astitsu.1901etik 1912ra bitartean Bernardo Jimenezek taxututako proiektua baloratu zen, hau da, Bilboko erdialdea eta Artxanda mendia lotuko zituen kremailera-trena. Proiektuak ez zuen aurrera egiterik izan, ez zegoen-eta nork finantzatu.

1915ean, ordea, Herri Lanetako zuzendaritzak Evaristo San Martin Garaz jaunaren proiektua onartu zuen, eta uztailaren 19an gutun bat bidali zioten gobernadore jaunari funikularra egiteko lanei oniritzia emanez, baina hobekuntza batzuk sartuta.

1915eko urriaren 7an egin zuen lehenengo bidaia, Benito Marco Gardoki jauna zela Bilboko Alkatea. Gerra zibilean Bilbok jasan zuen setioan errailak eta goiko geltokia bonbardatu zituzten. Zerbitzua etenda egon zen 1938ko uztailaren 18ra arte. Egun hartan zabaldu zen berriro, Mariano del Corral jaunaren zuzendaritzapean egindako behin-behineko konponketa batzuekin.Garai haietan, langile batek gogorarazten digunez, txartela pezetaren 60 zentimo ordainduta baserritarrek ortuariak jaisten zituzten markatuan saltzeko, motorrak konpontzeko edota bigantxak hiltegira eroateko.Zoritxarreko istripua gertatu zen 1976ko ekainaren 29an eta zerbitzua luzaro egon zen geldi. Kable eragilea aldatzean akats bat izan zen balazten euste-indarrean eta barailetan; ondorioz, bagoi bat beheko geltokirantz amildu zen lau langile barruan zituela: Jose Landa, Jose Mª Bilbao eta Juan Rekalde irten egin ziren bagoitik salto eginda; ez, ordea, Isidro Aurrekoetxea; behegainean etzanda geratu zen beheko geltokira iritsi arte; han, talka jo ondoren, atera eta Basurtuko ospitalera altxatu zuten; han egon zen harik eta zauriak sendatu arte. Zauri arinak izan zituen Julio Rodriguez sozietateko gerentea zenak ere.Zazpi urteko geldialdiaren ostean zerbitzua atzera jarri zen abian 1983an. Instalazio guztiak, hau da, errailak, bagoiak eta geltokiak berriztatu egin ziren, Rafael Pineda gerente zela. Urte hartako apirilaren 30ean zabaldu zen berriro. Goiko geltokian funikular berriaren lanak, eta zaharraren egoera erakusten duten argazkiak daude.1983a zoritxarreko urtea izan zen. Uholdeak izan ziren urte hartan Bilbon: erauntsiak, lokatza, haitzak eta abar jausi ziren beheko geltokian. Urak nasa hondatu eta bagoiak erdiraino estali zituen. Urte bereko azaroaren 4an jarri zen berriro abian zerbitzua.

Artxandara heldu eta bertatik Bilbo osoa ikusi ahal izan dugu. Azaroa izan arren, eguraldiak nahiko lagundu digu eta paseotxoa egiteko aukera polita izan dugu.

Gerra Zibilean Bilbo defendatu zuten Gudarien omenez egindako monumentoa ikusten.

Agur Artxanda! Bueltatuko gara!

MASAJE METAMORFIKOA

2009-10-29T16:14:00.007Z

Lekua: Barandiaran Aek euskaltegia.

Data: azaroaren 16 eta 23a.

Prezioa: debalde!!!

Ikutu leun bat

Masaje metamorfikoa oin, esku eta buruan egindako ikutu leun baten datza. Bertan islatzen baita nor garen, gure oroitzapenak eta gure aukerak.

Zer da masaje metamorfiko?

"Metamorfosis" hitzak "transformazio" esan nahi du, eta hau gure energia askatutasunez ibiltzen denean ematen da. Teknika honek amaren sabelean bizitako bederatzi hilabete hoiekin konektatzen gaitu, eta gure bizitzan ditugun nahiez jabetzera eramaten gaitu.

Gizakia etengabeko tranformazioan dagoela uste duen teknika da; ondorioz, gure egoera animokoa oztopatzen duten blokeoak desagiteko kapazak garela esaten duena.

Zertarako balio du?

Pertsonen bizi-energia mugitzeko gai da, horrela arazo fisiko, mental eta emozionalak konponduz joaten dira, bakoitzarengan autosendatze gaitasuna esnarazten baita.

IZENA EMATEKO

Deitu telefono honetara: 94 456 41 19 edo idatzi email bat helbide honetara: galdakao_berba@aek.org

Epea dagoeneko irekita dago eta azaroaren 10ean itxiko da.

TALDE KULTURALA!!!

2009-10-29T10:03:00.002Z

Hara non kultura, museoak... maite dituzten gure berbalagunak asteartero elkartzea erabaki duten. Talde honen xedea bai Euskal Herria, bai Euskal Herriko kultura eta museoak ezagutzea da. Horretarako asteartero elkartzea erabaki dute.

Hurrengo asteartean, azaroaren 3an, Bilboko Euskal Museoa ikusten joango. Goizeko 10:30ean geratu gara Juan Bautista Uriarteko "Laboral"aren aurrean dagoen autobus geltokian. Bisita gidatua izango da.

Museorako sarrera, gida barne, 2,5 eurokoa izango da. Bisita gidatua 40 minutukoa izango da, nahiz eta gero gauzak gure kabuz ikusteko aukera ere izango dugu.

Informazio gehiago nahi baduzu, edota gurekin etorri nahi baduzu, deitu 94 456 41 19 edo idatzi email bat galdakao_berba@aek.org helbide elektronikora.

Anima zaitez! Euskal Herria ezagutu behar dugu eta!

BERBAPOTEO TALDEA BERRIRO MARTXAN!

2009-10-29T09:58:00.002Z

Bihar, urriaren 30ean, poteo taldea berriro elkartuko da Galdakaoko kaleetan zehar euskal poteo itzela egiteko. Uda, jaiak... eta hainbat kontu atzean utzi eta udazkenean sartuta ostiraletako poteotxura itzuliko gara.
Elkar berriro agurtu, elkarri udako istoriotxoak kontatu... eta jende berria ezagutu dugu! Ea aurten jende gehiago elkartzen garen!
Bide batez biharko itzordua ikasturteko hainbat kontu planeatzeko erabil dezakegu: asteburu pasak, irteerak... badakizue, pote batzuk hartu ostean ideia berri asko etortzen zaizkigu burura.
Benga koadrila! Animatu eta etorri gurekin! Ederto pasako duzu eta!

BUELTATU GARA... ETA INOIZ BAINO INDARTSUAGO!!

2009-10-08T21:29:00.003Z

Urriaren 5etik aurrera Berbataldeak martxan dabiltza berriro. Nahiz eta irailean zehar batzuk martxan ibili diren, data hau izan da hasiera formala markatzeko eguna. Dagoeneko aste honetan talde guztiak bildu dira. Ekainean lau talderekin bukatu genuen eta urrian dagoeneko bost talde ditugu, eta inoiz baino indartsuago eta gogotsuago. Honen irudi ostegunetan gaueko 21:00etan Gambrinus tabernan elkartzen den gure talde jatorra.

Taldeak inoiz baino jendetsuago daude, eta gu izugarri pozten gara. Aurpegi berriak , ideia berriak... Uda baino lehen ederto bukatu bagenuen, oporren ostean ederto baino edertoago hasi gara; eta hau hasiera baino ez da.

Beraz, gaur egun, 5 berbatalde ditugu Galdakaon eta honako egun, leku eta ordutegietan elkartzen dira:

ASTEARTEETAN 18:00etan URKI tabernan

ASTEAZKENETAN 11:30ean GURE LEKU tabernan

OSTEGUNETAN 18:00etan NEW PAKABER tabernan

OSTEGUNETAN 20:30ean ZURRUT tabernan

OSTEGUNEAN 21:00ean GAMBRINUS tabernan

Gainera, hurrengo egunetan, berriro jarriko dira martxan gure JOSTUNAK. Hor arituko dira, azken urteetan bezalaxe euskal jantzi tradizional zoragarriak josten. Urtero bezala jostunen ordutegia mantendu egingo da, eta honakoa izango da:

ASTEARTEETAN 18:00etan AEK-n

BerbaPOTEO taldea martxan ibiliko da oraingoan ere. Aurrekoan bezala hamabost egunerik behin elkartuko da eta herriko hainbat tabernetatik ibiliko da euskaraz poteatzen. Ostiraletan elkartuko da talde parrandazale hau eta hurrengo poteoa urriaren 15ean izango da.

Hauek dira egun dauden talde eta egutegiak, baina gehiago izatea espero dugu. Beraz badakizue, animatu eta hurbildu Berbalagunera, zure zain gaude eta!

... UDA BAINO LEHEN EDERTO BUKATU GENUEN

2009-10-08T21:07:00.004Z

Eguraldi onarekin batera oporrak hartu genituen, baina ederto asko pasatu genuen aurreti. Hainbat ekintza egin genituen ekainean zehar ikasturteari bukaera emateko, horien artean San Juan bezperan egindako euskal kaimada eta asteburu barnetegia. Bietan eguraldi ederraz gozatu genuen eta euskaraz aritzeko aukera paregabea izan genuen.

San Juan bezperan aek-n elkartu ginen eta bertan kaimada gozo-gozoa dastatu genuen, Carlosek, gure berbalagun galegoak prestatutako. Konxuro eta guzti urteko gauza txarrak utzi eta berriak erakartzen saiatu ginen.

Ekainan ere, eguraldi ederrak lagunduta, Aulestira joan ginen asteburu barnetegian. Aulestiko aterpetxean ibili ginen, oso gustura ibili ere, benetan leku polita, erosoa eta euskalduna baita. Oso ongi hartu gintuzten eta herriko euskaldunak beti egon ziren gurekin hitz egiteko prest.

Bertan geundela, eta jakinda Hondarrun Zapato Azule ospatzen zela... zelan galdu horrelako aukera? Kotxeak hartu eta Hondarruraino joan ginen, batzuk arrantzale jantzi eta guzti. Egun zoragarria pasatu genuen hondarrutarren artean, eta nola ez, euskara hutsean. 2010ean bueltatuko ginela agindu genuen... beraz, hasi prestatzen!

Berbalagunak berriro martxan!

2009-10-06T16:29:00.003Z

Urriaren 5etik aurrera berba taldeak abian hasiko dira, nahiz eta dagoeneko batzuk martxan dabiltzan. Iazko esperientzia ona ikusita, eta euskaraz bizitzea atsegin dutenez, galdakaotar mordo batek ekimen honetan berriro parte hartzea erabaki du, eta beste askok esperientzia berri bat bizitzea erabaki dute. Hau zertan datzan ez dakitenentzat, hona hemen hainbat argibide:
*Galdakaoko Euskara Arloa, Galdakaoko Udal Euskaltegia eta Galdakaoko AEK programaren eragileak dira.
*Norentzat da BERBALAGUN?Euskara ikaslearentzat: Euskaltegian bazaude edo egon bazara, baina ez baduzu norekin hitz egin hemen duzu aukera.Euskaldunarentzat: Normalean gazteleraz egin arren euskaraz gehiagotan egin gura baduzu, hemen duzu aukera.Euskara ez dakienarentzat: Agendaren bitartez euskarak dituen baliabideekin gozatzeko, hemen duzu aukera.

*Zer eskaintzen du BERBALAGUNak?Berbalagunak: Adina, zaletasunak, eta disponibilitatea kontuan hartuta lauzpabost laguneko taldeak osatuko dira. Euskaraz hitz egiteko konpromisoa hartuta talde bakoitzak dinamizatzailea aukeratuko du eta denon artean erabakiko dute noiz, non eta zertarako bildu.Euskararen Agenda: Ikastaroak, txangoak, kultur ikuskizunak, kontzertuak, antzerkia, errezitaldiak, bertso saioak, diaporamak, eztabaida foroak, hitzaldiak, erakusketak..Euskaraz jendea ezagutu eta ondo pasatu gura baduzu, ez izan dudarik. Berbalaguna izan nahi duzu!! Animatzen bazara, izena eman dezakezu Galdakaoko AEKn, Udal Euskaltegian edo Euskara Sailean, bestela bidaliguzu email bat.

SAN JUAN BEZPERA

2009-06-23T09:53:00.004Z

Gaur, ekainak 23, San Jaun bezpera dugu. Urteko gaurik laburrena izango dugu gaurkoa, baina bizi-bizia izan ohi dena.

Gauza txarrak erre, gauza onei lekua egiteko. Izpiritu gaiztoak uxatuz, aro berriari ongi etorria eman. Iragana gibelean utzi, geroari indar berriz ekiteko. Solstizioa eta San Juan aitzeki, estakuru edo egokiera ona izan dira aldaketak gauzateko edo geure baitango ordenagailua zerbaitetan berrabiatzeko. San Juanen ondotik, uda sasoia dator Euskal Herrian.

Galdakaon urtero bezala egun hauek ospatuko dira . Honako hau da jarduera programa:

Ekainaren 23a:San Joan bezpera.

22:00etan. San Joan sua. Errituak eta konjuruak, sanjoanetako kantuak, haurrentzako jokoak, erromeria (Santi Brouard plazan).

22:45ean: San Joan gaua. Txalapartariak, trikitilariak, txokolatada, San Joan ura, irudi mitologikoak Muguru zelaian.

23:00etan. Dantzaldia. Muguru zelaian.

Ekainaren 24a:San Joan

12:00etan: Haur parketa Agirre lehendakariaren plazan, puzgarriekin eta haurrentzako ludotekarekin. Parke hau arratsaldez ere irekita egongo da, 17:00etatik aurrera.

18:00etan: kalejira eta Galdakaoko dantzari txikien emanaldia. Santi Brouard plazan, Kurtzeko plazatik abiatuta.

Gu ere ez dugu gutxiago izan nahi eta gaur San Juan bezpera ospatzeko geratu gara. Arratsaldeko 19:00etan hasiko gara gure konjurotxoekin, aek euskaltegian galego baten laguntzaz "kaimada" berezitxoa egingo baitugu. Euskaraz egindako "kaimada" galdu nahi ez baduzu, etor zaitez gurekin.

Bertan edabetxua edan eta girotu ostean, herrian murgilduko gara, gau berezi honek eskeiniko dizkigun momentuez euskaraz gotzatzeko.

Animatu eta etorri gurekin!

ASTEBURU BARNETEGIA

2009-06-16T16:00:00.004Z

Ekainaren azken asteburuan, ekainaren 26-27-28, Galdakaoko hainbat berbalagun asteburu pasa joango gara Aulestira. Ostiral arratsaldetik igande arratsaldea arte ederto pasatzeko aukera paregabea izango dugu bertan. Ez dakienarentzako esan, Aulesti Lekeitiotik 10 minutura dagoela, eta asteburuan zehar bai mendi irteeratxoak egiteko, bai hondartzan jolasteko aukerak izango ditugula. Bertan tailertxoren bat egitea ere proposatzen dugu. Horretarako guk gure ideiak ditugu, baina besteen ideiak gustura hartuko genituzke. Anima zaitezte eta etorri gurekin!
Bertan aterpetxe batean hartuko dugu ostatu. Gaueko 20 euro izango dira (gosaria barne) eta bertara hurbiltzeko taldetxoak egingo dutugu, ahalik eta kotxe gitxien eramateko. Aulesti herri euskaldun-euskalduna da eta 24 orduz euskaraz jarduteko aukera izango dugu, agian gure herrian ezinezko egiten zaiguna. Gainera, ezagutzen ez ditugun hainbat gauza bisitatuko ditugu gure ezagutzak zabaltzeko.
Animatu eta eman izena! Izena emateko azken eguna ekainaren 22a izango da, astelehena.Izena eman nahi duenak gurekin kontaktuan jar dadila honako telefonora deituz 94 456 41 19 edota helbide elektroniko honetara galdakao_berba@aek.org emaila bidaliz!
ANIMOOO!!!!

MINTZAEGUNA 09

2009-06-08T13:50:00.004Z

Pasa berri den larunbatean Mintzaeguna 09 ospatu zen Gasteizen. Galdakaoko Berbalagun bertara hurbildu zen ederto pasatzeko asmoz. Eguerdian Gateizera heldu eta ongi etorri eta hamaiketako ederraren ostean, eta behin bertsolariak eta txalapartariak ikusita, indarberrituta eta pozez gainezka Gasteizko alde zaharrean zehar danok Tour Kultural txikitxo bat egiteari ekin genion. Benetan ibilbide polit eta interesgarria. Ezkontza eta guzti ikusi genuen Andra Mari Zuriaren balkoira, Zeledonen parera ailegatu ginenean. Gasteizen inguruko gauza asko ikasi ikasi genituen, baita barre algara ederreak egin ere. Hor ibili ginen berbalagun mordoa Alde Zaharreko kaleak gora eta kaleak behera, txirrindulari tropelen antzera, denak nahastuta eta jai giroan.

Azkenean bazkaltzeko ordua heldu eta ederto bazkaldu genuen. Baina horrenbeste janda, tripa beteta ezin etxera joan eta bertan hasi zen jendea dantza eta dantza. Batzuk hobeto, beste batzuk traketsago... baina denak alai-alai.

Hurrengoan ere bertan egongo dira Galdakaoko Berbalagunak, dantzak oso abilak ez gara izango, baina ondo pasatzeko gustuko daukagu. Beraz hurrengorarte! Guk beste urte bat emango dugu euskaraz jo ta fuego, mintzaeguna 10 heldu arte. Argazki gehiago ikusi nahi badituzue klikatu hemen.

BERBAPOTEO TALDEA

2009-06-08T13:42:00.002Z

Gogoratu poteo taldea martxan dagoela. Bi ostiralerik behin elkartzen gara eta Galdakaoko kale eta tabernetan zehar barre algaraka ibiltzen gara. Taldekide batzuek dagoeneko izena aldatu diote gure taldetxoari, eta gure artean ere "LAGUNTEGI" esaten diogu. Zergaia jakin nahi baduzue, ez lotsatu eta hurbildu ostiral honetako poteora! Hori bai, erantzunaren bila etorriz gero galdetu gure Katalunyako neskatilari... Berak ederki kontatuko dizue eta. Beraz animatu eta gurekin primeran pasatzera etorri! Ordutegirik gabeko poteotxoa; batzuk goizago joaten dira, beste batzuk beranduago eta betikoak tabernak itxitakoan... Animo koadrila eta ostiral honetan, ekainaren 12an, hurbildu ZURRUT tabernara arratsaldeko 20:00etan. Bertan aurkituko gaituzu! Ostirala arte.

Poteo taldearen eta Berbalagunen argaki gehiago ikusi nahi badituzu egin klik hemen.

IBILALDIAREKIN BAT!

2009-05-28T14:55:00.004Z

Egun gutxi barru Ibilaldia izango dugu Galdakaon. Igande honetan bertan, maiatzaren 31an, gure herriko kale eta txoko guztiak inoiz baino euskaldunago somatuko ditugu. Bertan ere jende euskaldunarekin elkartu eta goiz edo egun ederra pasatzeko aukera izango dugu. Egun osoan zehar hainbat ekitaldi, bertso-saio, kontzertu eta egiteko egongo dira. Eta guri guztioi hori dana, batez ere euskaraz egiten direnak, izugarri gustatzen zaizkigunez, bertan egongo gara. Goizeko 11:00etan geratu gara Baserri tabernan, bartan ederto gosaldu eta indarberritzeko. Bertatik bertso-saioa ikustera joateko asmoa daukagu. Eta gero gerokoak... Guztion artean erabakiko dugu zer egingo dugun. Argi dagoen gauza bakarra, giro euskaldunean egun ederra pasako dugula da. Animatu eta etorri gurekin.

IBILALDIA 09ri buruzko informazio gehiago izan nahi baduzu, klikatu hemen

FIELTRO TAILERRA

2009-05-19T17:13:00.002Z

Tango ikastaroak huts egin digu eta bere lekua betetzeko FIELTRO TAILERRA egingo dugu biharko egunean, maiatzaren 20an. Bertan hainbat berbalagun elkartuko gara Aek euskaltegian arratsaldeko 6etan. Ederto igaroko dugu arratsaldea brotxeak, urkilak, giltzetakoak... eta beste hainbat kontu egiten. Ezin imagina dezakezue zenbat gauza egin daitezkeen fieltroagaz. Gainera askari txiki baten laguntzaz indarrak berriztuko ditugu. Animo eta etorri gurekin euskaraz mintzatzera eta primeran pasatzera.

TANGO IKASTAROA ATZERATUKO DA

2009-05-19T16:00:00.002Z

Gure tango irakasle maiteak istripu txiki bat izan eta eskua bihurritu egin du. Nahiko minduta dago eta gutxienez hamabost egunerako izango du igeltsoa. Bera sendatu bezain laster Tango ikastaroari ekingo diogu!
Animo!

TANGO IKASTAROA

2009-05-15T15:41:00.006Z

Euskaldunok ere tangoa dantza dezakegula ikusi eta ikasiko dugu! Areto dantzak eta bereziki tangoa gustuko dituzula? Dantzan oso traketsa zarela eta hobetu nahi duzula? Edo beste barik ondo pasatu, euskaraz mintzatu eta jende berria ezagutu nahi duzula? Animatu ba! maiatzaren 20tik ekainaren 10a arte TANGOA ikasten ibiliko gara hainbat berbalagun. Zeu ez zara gutxiago izango, ezta? Asteazkenero elkartuko gara (4 egun) aek euskaltegian. Ea ikastaro bukaeran kapela, larrosa eta guzti dantzatzeko gai garen! Animo DEBALDE da eta!

MINTZA EGUNA 2009

2009-05-12T14:52:00.005Z

Mintza Eguna, mingaina dantzatzen dugunon eguna
Laugarrenez ospatuko da Mintza Eguna aurten, non eta Gasteizen. Mintzapraktika egitasmoetan parte hartzen duten milaka lagunei eskainitako eguna da, uda aurretik Topaguneak, Euskara Elkarteen Federazioak, antolatzen duen bilkura handia, Euskal Herri osoko Mintzalagun, Berbalagun, Solaskide, Mintzakideak elkartzeko eguna. Ekainaren 6an Gasteiz mingainak dantzatzen jarriko ditugu eta Euskal Herriko mingain dantzazaleak gonbidatuak daude.
Egitaraua:
Esan dugun bezalaxe, Mintza Egunaren laugarren edizioa Gasteizen egingo dugu,
ekainaren 6an, larunbata. Egun pasa ederra, Arabako hiriburuko txokoak eta
historia hobeto ezagutzeko, eta mingainak dantzan ere jartzeko aukera izango
dute bertaratzen direnek. Hona hemen egitarau zehatza:
§ 11:00etan: Ongi etorria eta hamaiketakoa Matxete plazan
§ 12:00etan Ibilaldi gidatua, Gasteiz ezagutzen.
§ 13:30ean Kalejira: Alde Zaharretik eta Landatxoraino.
§ 14:00etan Bazkaria Landatxon.
§ 15:30ean Sari banaketa.
§ 16:00etan Erromeria Erdizka Lauetan taldeak gidatua.
Bazkalostean: Sari banaketa.
Aurten ere, laugarrenez, mintzapraktika egitasmoen bilakaeran parte hartze eta garrantzia berezia izan duten hainbat erakunde eta lagun sarituko ditugu. Ondoren, jakina, kantuan, dantzan eta, nola ez, mintzapraktikan ere aritzeko aukera egongo da, Erdizka Lauetan taldearekin.

BADATOR IBILALDIA!

2009-05-08T17:03:00.007Z

Joan zen negua, joan zen Korrika eta hemen datorkigu IBILALDIA. Guztiok jakingo duzuenez, maitzaren 31n IBILALDIA ospatuko dugu Galdakaon. Ibilaldia herriarentzat eta herriaren laguntzaz egiten den ekitaldia denez gero, IBILALDIAri gure laguntza eskaintzea ondo legoke. Bada banakako laguntza emateko aukera, baina taldean laguntzea interesgarriago iruditzen bazaizu, hurbil zaitez gugana eta danok elkarrekin indar handiagoa izatea lortuko dugu! Ibilaldiari buruzko informazio gehiago, Ibilaldia beraren orrialdean topatuko duzue: http://www.ibilaldia.com/